അല്ലു അർജുന് ദേശീയ പുരസ്കാരം നേടിക്കൊടുത്ത ചിത്രമായ ‘പുഷ്പ’ റിലീസ് ചെയ്തിട്ട് രണ്ട് വർഷം പിന്നിട്ടു. 2021 ഡിസംബർ 17-നാണ് സുകുമാർ സംവിധാനം ചെയ്ത ചിത്രം തിയേറ്ററുകളിലെത്തിയത്. പാൻ ഇന്ത്യ ലെവലിൽ റിലീസ് ചെയ്ത ചിത്രം വമ്പൻ ഹിറ്റായിരുന്നു.
ചിത്രത്തിലെ മാസ് ഡയലോഗുകളും ഗാനങ്ങളുമെല്ലാം സിനിമാപ്രേമികൾ ഏറ്റെടുത്തിരുന്നു. ചിത്രത്തിൽ പ്രധാന വേഷത്തിലെത്തിയ ഫഹദ് ഫാസിലും പുഷ്‌പയിലൂടെ പാൻ ഇന്ത്യ തലത്തിൽ ഏറെ ശ്രദ്ധിക്കപ്പെട്ടു. ഇപ്പോൾ പുഷ്പയുടെ രണ്ടാം ഭാഗത്തിനായുള്ള കാത്തിരിപ്പിലാണ് പ്രേക്ഷകർ. 2024 ഓഗസ്റ്റ് 15-ന് സ്വാതന്ത്ര്യദിനത്തോടനുബന്ധിച്ച് ചിത്രം തിയേറ്ററുകളിലെത്തുമെന്ന് അണിയറപ്രവർത്തകർ വ്യക്തമാക്കി.
പ്രേക്ഷകർക്കിടയിൽ തരംഗമായ ചിത്രം എന്ന നിലയിലും മൂന്നു വർഷത്തെ ഇടവേളയ്ക്ക് ശേഷം പുറത്തിറങ്ങുന്ന അല്ലു അർജുന്റെ ചിത്രം എന്ന നിലയിലും പുഷ്പ 2വിന് വേണ്ടി ആകാക്ഷയിലാണ് ആരാധകർ. മൈത്രി മൂവി മേക്കേഴ്സാണ് പുഷ്പ 2 നിർമ്മിക്കുന്നത്. അല്ലു അർജുൻ, രശ്‌മിക മന്ദാന, ഫഹദ് ഫാസിൽ തുടങ്ങിയവർ പ്രധാനവേഷത്തിലെത്തുന്ന ചിത്രത്തിന്റെ സംഗീതസംവിധാനം നിർവഹിക്കുന്നത് ദേവി ശ്രീ പ്രസാദാണ്.
