സംവിധായകൻ ആദിക് രവിചന്ദ്രനും നടൻ പ്രഭുവിന്റെ മകൾ ഐശ്വര്യ പ്രഭുവും വിവാഹിതരായി. ചെന്നൈയിൽ വച്ചു നടന്ന ചടങ്ങിൽ ഇരുവീട്ടുകാരുടെയും അടുത്ത ബന്ധുക്കള്‍ മാത്രമാണ് പങ്കെടുത്തത്. അടുത്തിടെ പുറത്തിറങ്ങിയ ‘മാർക്ക് ആന്റണി’ എന്ന സൂപ്പർഹിറ്റ് സിനിമയുടെ സംവിധായകനാണ് ആദിക്. സിനിമാ രംഗത്തുനിന്നും നടൻ വിശാൽ ചടങ്ങിനെത്തി. കുറേക്കാലമായി അടുത്ത സുഹൃത്തുക്കളായിരുന്നു ഐശ്വര്യയും സംവിധായൻ ആദിക് രവിചന്ദ്രനും. ആ സൗഹൃദം പിന്നീട് പ്രണയമായി മാറി. നടൻ വിക്രം പ്രഭു ഐശ്വര്യയുടെ ഏക സഹോദരനാണ്.
2015ൽ ‘തൃഷ ഇല്ലാനാ നയൻതാര’ എന്ന സിനിമയിലൂടെയാണ് ആദിക് സംവിധാന രംഗത്തെത്തിയത്. പ്രഭുദേവയെ നായകനാക്കി ‘ബഗീര’ എന്ന ചിത്രവും ആദിക് സംവിധാനം ചെയ്തിട്ടുണ്ട്. ഈ വർഷം പുറത്തിറങ്ങിയ ‘മാർക്ക് ആന്റണി’ എന്ന സയൻസ് ഫിക്‌ഷൻ ചിത്രം സൂപ്പർ ഹിറ്റായതോടെ ആദികും സൂപ്പർ ഹിറ്റ്‌ സംവിധായകനായി മാറി.
അജിത് കുമാറിനെ നായകനാക്കി പുതിയ ചിത്രം സംവിധാനം ചെയ്യാൻ ഒരുങ്ങുന്നതിനിടെയാണ് വിവാഹം. 2024ൽ സിനിമയുടെ ചിത്രീകരണം ആരംഭിക്കും. അതേസമയം ‘നേർകൊണ്ട പാർവൈ, കോബ്ര എന്നീ സിനിമകളിൽ അഭിനേതാവും ആദിക് വേഷമിട്ടിട്ടുണ്ട്.
