ദുബായ് ടാക്‌സി കമ്പനിയുടെ ഓഹരികൾ ഇന്ന് മുതൽ പൊതുജനങ്ങൾക്ക് സ്വന്തമാക്കാൻ അവസരം. ഒരു ഷെയറിന് 1.80 ദിർഹം മുതൽ 1.85 ദിർഹം വരെയാണ് വില കണക്കാക്കുന്നത്. നവംബർ 28 വരെയാണ് ഷെയർ സബ്‌സ്ക്രിപ്ഷനായി അപേക്ഷ നൽകാൻ സാധിക്കുക.
കമ്പനിയുടെ 24.99 ശതമാനം ഓഹരികളാണ് ഷെയർ മാർക്കറ്റിലേക്ക് എത്തുന്നത്. ഇത്തരത്തിൽ 62,47,50,000 ഷെയറുകളാണ് വിപണിയിലെത്തുക. നടപടികൾ പൂർത്തിയാക്കി ഡിസംബർ ഏഴിന് ഓഹരികൾ ദുബായ് ഫിനാൻഷ്യൽ മാർക്കറ്റിൽ ലിസ്റ്റ് ചെയ്യപ്പെടുമെന്നാണ് പ്രതീക്ഷ. യുഎഇയിലെ വിവിധ ബാങ്കുകൾ വഴി പൊതുജനങ്ങൾക്ക് നവംബർ 28 വരെ ഓഹരികൾക്ക് അപേക്ഷ നൽകാൻ സാധിക്കും. 4.6 ശതകോടി ദിർഹം മൂല്യമുള്ള ഓഹരി മൂലധനം ഇതിലൂടെ സമാഹരിക്കാൻ സാധിക്കുമെന്നാണ് നിഗമനം.
ദുബായ് ഭരണാധികാരി ഷെയ്ഖ് മുഹമ്മദ് ബിൻ റാഷിദ് അൽ മക്തൂമാണ് ദുബായ് ടാക്സിയുടെ ഷെയറുകൾ ഓഹരി വിപണിയിലേക്ക് മാറ്റാൻ കഴിഞ്ഞ ദിവസം ഉത്തരവിട്ടത്. ദുബായിലെ സാലിക്, ദീവ എന്നിവയുടെ ഷെയറുകൾ കഴിഞ്ഞ വർഷങ്ങളിൽ ഇത്തരത്തിൽ ഓഹരി വിപണിയിൽ പൊതുജനങ്ങൾക്ക് വിറ്റഴിച്ചിരുന്നു.
