തെരഞ്ഞെടുപ്പ് രാഷ്ട്രീയത്തിലേക്ക് പ്രവേശിക്കുമെന്ന സൂചന നൽകി ബോളിവുഡ് നടി കങ്കണ റണാവത്ത്. ‘ഭഗവാൻ കൃഷ്ണൻ അനുഗ്രഹിച്ചാൽ അടുത്ത ലോക്സഭാ തെരഞ്ഞെടുപ്പിൽ മത്സരിക്കുമെന്നാണ് കങ്കണ പറഞ്ഞത്. ഗുജറാത്തിലെ പ്രസിദ്ധമായ ശ്രീകൃഷ്ണ ദ്വാരകാധീഷ് ക്ഷേത്രത്തിൽ ദർശനം നടത്തിയ ശേഷം മാധ്യമങ്ങളോട് പ്രതികരിക്കുകയായിരുന്നു താരം.
അതേസമയം അയോധ്യയിൽ ശ്രീരാമ പ്രതിഷ്ഠ സാധ്യമാക്കിയ ബിജെപി സർക്കാരിനെ നടി പ്രശംസിക്കുകയും ചെയ്തു. ‘ബിജെപി സർക്കാരിന്റെ ശ്രമങ്ങളുടെ ഫലമായി 600 വർഷത്തെ പോരാട്ടത്തിനൊടുവിലാണ് ഇന്ത്യക്കാർക്ക് ഈ ദിവസം കാണാനായത്. മഹത്തായ ആഘോഷത്തോടെ ക്ഷേത്രം സ്ഥാപിക്കും. സനാതന ധർമ്മത്തിന്റെ പതാക ലോകമെമ്പാടും ഉയരണം’ എന്നും കങ്കണ പറഞ്ഞു.
അത് കൂടാതെ കടലിനടിയിൽ മുങ്ങിയ ദ്വാരക നഗരത്തിന്റെ അവശിഷ്ടങ്ങൾ സന്ദർശിക്കാൻ തീർഥാടകർക്ക് ആവശ്യമായ സൗകര്യം ഒരുക്കണമെന്നും കങ്കണ സർക്കാരിനോട് ആവശ്യപ്പെട്ടു. ‘ദ്വാരക ഒരു ദിവ്യ നഗരമാണെന്ന് ഞാൻ എപ്പോഴും പറയാറുണ്ട്. ഇവിടെ എല്ലാം അത്ഭുതമാണ്. എല്ലാ കണികകളിലും ദ്വാരകാധിഷ് ഉണ്ട്. അവനെ കാണുമ്പോൾ ഞാൻ അനുഗ്രഹീതനാകും. ഭഗവാനെ ദർശിക്കാൻ ഞാൻ എപ്പോഴും ശ്രമിക്കാറുണ്ട്. ജോലിയിൽ നിന്ന് ഇടവേള ലഭിക്കുമ്പോഴെല്ലാം ഞാൻ ഭഗവാനെ കാണാൻ വരും എന്നും കങ്കണ പറഞ്ഞു.
