ഏറ്റവും പുതിയ സാങ്കേതിക വിദ്യകളുടെ അത്ഭുതങ്ങൾ ലോകത്തിന് മുന്നിലേക്ക് തുറക്കുന്ന വാതായനമാണ് വാർഷികാടിസ്ഥാനത്തിൽ ദുബായിൽ നടക്കുന്ന ജൈറ്റക്സ് ഗ്ലോബൽ. കുഞ്ഞുപേന മുതൽ റോക്കറ്റ് സാങ്കേതിക വിദ്യകൾവരെയുളള നൂതന കണ്ടുപിടുത്തങ്ങളാണ് ജൈറ്റക്സ് മേളയുടെ ആകർഷണവും പ്രത്യേകതയും.
ലോകം ആധുനികത സാങ്കേതിക വിദ്യകളുടെ കാലത്തേക്ക് കടക്കുന്നതിൻ്റെ തുടക്കം. പുതിയ വിദ്യകൾ പരിചയപ്പെടുന്നതിനും വിശാല സാധ്യതകൾ പരിശോധിക്കുന്നതിനുമായി 1981ൽ ആരംഭിച്ച പ്രദർശനം വളരെവേഗം ആഗോള സ്വീകാര്യതയിൽ എത്തുകയായിരുന്നു. ആദ്യ വർഷം വൈറും മൂവായിരം സന്ദർശകരാണ് മേളയിലെത്തിയതെങ്കിൽ ഇക്കുറി പ്രദർശകർ മാത്രം ആറായിരം കവിയും.
ലോകത്തെ ആധുനിക സൌകര്യങ്ങളും ആഗോള നഗരമെന്ന നിലയിൽ ദുബായും വളർന്നതോടെ ദുബായ് ജൈറ്റക്സും വിപുലീകരിക്കപ്പെട്ടു. അന്തർദേശീയ പങ്കാളിത്തം വർഷാവർഷം ഇരട്ടിച്ചു. ആഗോള ടെക് ഭീമന്മാരും സ്റ്റാർട്ടപ്പുകളും വ്യവസായ വിദഗ്ദ്ധർക്കും സർക്കാർ സ്ഥാപനങ്ങൾക്കും കമ്പനികൾക്കും ജൈറ്റക്സ് ഗ്ലോബൽ പ്രിയപ്പെട്ട ഇടമായി മാറി. അവരുടെ പുതിയ ഉൽപ്പന്നങ്ങൾക്കും സേവനങ്ങൾക്കുമുള്ള ലോഞ്ച്പാഡായി ജൈറ്റക്സിനെ ഉപയോഗിച്ച് തുടങ്ങിയതും മേളയുടെ ആകർഷണീയത വർദ്ധിപ്പിച്ചു.
നിക്ഷേപകർക്കും പങ്കാളികൾക്കും അവരുടെ ആശയങ്ങളും ഉൽപ്പന്നങ്ങളും എത്തിക്കുന്നതിനുള്ള ഒരു പ്ലാറ്റ്ഫോം എന്ന നിലയിൽ അന്താരാഷ്ട്രതലത്തിൽ അടയാളപ്പെടുത്തുന്ന മേളയായി ജൈറ്റക്സ് ഗ്ലോബൽ ഉയർന്നു.
ആദ്യ കാലത്ത് കമ്പ്യൂട്ടറുകളും സോഫ്റ്റുവെയറുകളും മറ്റും അടക്കിവാണ പശ്ചാത്തലത്തിൽനിന്ന് ആർട്ടിഫിഷ്യൽ ഇൻ്റലിജൻസിൻ്റേയും ബ്ലോക്ചെയിൻ്റേയും അനന്ത സാധ്യതകളാണ് ജൈറ്റക്സ് ഗ്ലോബൽ തുറന്നിടുന്നത്. ക്ലൌഡ് കമ്പ്യൂട്ടിംഗ് , സൈബർ സുരക്ഷ,റോബോട്ടിക്സ് , ഓട്ടോമേഷൻ, ഓഗ്മെൻ്റ് റിയാലിറ്റി , വെർച്വൽ റിയാലിറ്റി തുടങ്ങിയ മേഖലകളിലെ വൻ മാറ്റങ്ങളാണ് പുതിയ മേളയിൽ അവതരിപ്പിക്കുന്നത്.
ചരിത്രം പരിശോധിച്ചാൽ ഗൾഫ് കമ്പ്യൂട്ടർ എക്സിബിഷൻ എന്നപേരിലാണ് ആദ്യ പ്രദർശനം അരങ്ങേറിയത്. 1988ൽ ഗൾഫ് ഇൻഫർമേഷൻ ടെക്നോളജി എക്സിബിഷൻ എന്ന പേരിൽ പ്രദർശനം തുടർന്നു.1989-ൽ 10,000 സന്ദർശകരിലേക്ക് മേള എത്തി. 1995-ൽ 350 പ്രദർശകർ പങ്കെടുത്തു. 25ആം വാർഷികത്തിൽ സന്ദർശകരുടെ എണ്ണം ഒന്നേകാൽ ലക്ഷത്തിലേക്കെത്തിയതോടെ മേള ആഗോളതലത്തിലെ ശ്രദ്ധേകേന്ദ്രമായി. 2010 മുതൽ സന്ദർശകരുടേയും പ്രദർശകരുടേയും വൻ കുതിപ്പാണ് മേളയിൽ പ്രകടമായത്.
പേഴ്സണൽ കമ്പ്യൂട്ടറും മറ്റും അപൂർവ്വമായിരുന്ന കാലത്തുനിന്ന് നമ്മുടെ നിത്യജീവിതത്തെ സമാനതകളിലാത്ത ലോകത്തേക്ക് ആനയിക്കുന്ന കണ്ടുപിടുത്തങ്ങളാണ് ഇക്കാലത്തിനിടെ അവതരിപ്പിക്കപ്പെട്ടത്. മുൻ മേളകളിൽ പ്രദർശിപ്പിച്ച ഡ്രൈവറില്ലാ വാഹനങ്ങളും പറക്കും കാറുകളും മറ്റും ഇന്ന് നഗരങ്ങളിലെത്തിത്തുടങ്ങി. ബയോമെട്രിക് വിദ്യകളും എെഎ അധിനിവേശവും മെഷീൻ ലേണിംഗും ഒക്കെ ജീവിതത്തെ ഏറെ സ്വാധിനിച്ചുതുടങ്ങി. ഇക്കാലത്തുകണ്ട വിസ്മയങ്ങളേക്കാൾ വലിയ കണ്ടുപിടുത്തങ്ങളാണ് പുതിയ മേളയിലെത്തുന്നത്.
അടുക്കള മുതൽ ഓഫീസുകൾ വരെ, പോക്കറ്റുകൾ മുതൽ വിമാനത്താവളം വരെ എന്തിനും ഏതിനും പുതിയ വിദ്യകളുടെ കടന്നുകയറ്റം നടക്കുന്ന കാലത്ത് ദുബായ് ഗ്ളോബൽ ജൈറ്റക്സ് മുന്നേറ്റം തുടരുകയാണ്. നൂറോളം രാജ്യങ്ങളിൽ നിന്ന് ആറായിരം കമ്പനികളും പ്രതിനിധികളും അണിനിരക്കുകയാണ് പരമ്പരാഗത വേദിയായ ദുബായ് വേൾഡ് ട്രേഡ് സെൻ്ററിൽ ആരംഭിച്ച 43-ാമത് മേളയിൽ. അഞ്ച് ദിവത്തിനിടെ 80 രാജ്യങ്ങളിൽ നിന്നായി 1,80,000 പേർ മേള കാണാനെത്തുമെന്നാണ് റിപ്പോർട്ടുകൾ. പിന്നെങ്ങനെ ജൈറ്റക്സ് ഗ്ലോബൽ ലോകത്തിലെ ഏറ്റവും വലിയ ടെക്നോളജി പ്രദര്‍ശന മേള ആകാതിരിക്കും.
