റാസൽഖൈമയിൽ 67 കാരനായ വയോധികനെ വാഹനമിടിച്ചിട്ടതിന് ശേഷം രക്ഷപ്പെട്ട 35 കാരനായ ഡ്രൈവറെ റാസൽഖൈ പോലീസ് അറസ്റ്റ് ചെയ്തു. ഇന്ന് പുലർച്ചെ 5.42നാണ് റാസൽഖൈമ പോലീസിന് അപകടത്തെക്കുറിച്ച് റിപ്പോർട്ട് ലഭിച്ചത്. ഇതിനെ തുടർന്ന് രക്ഷപ്പെട്ട ഡ്രൈവറെ കണ്ടെത്താൻ പോലീസ് പ്രത്യേക ദൗത്യസേനയെ രൂപീകരിക്കുകയായിരുന്നു.
സെർച്ച് ആൻഡ് ട്രാഫിക് കൺട്രോൾ ടീം അപകടം നടന്ന അന്നബ ഏരിയയിലേക്ക് എത്തുകയും സ്മാർട്ട് ക്യാമറകൾ വഴി മിനിറ്റുകൾക്കകം തന്നെ വാഹനം കണ്ടെത്തുകയും ചെയ്തു. റാസൽഖൈമ പോലീസിന്റെ ട്രാഫിക് ആൻഡ് പട്രോൾ വിഭാഗം ഡയറക്ടർ കേണൽ ഡോ. മുഹമ്മദ് അബ്ദുല്ല അൽ-ബഹാർ ആണ് ഇക്കാര്യം അറിയിച്ചത്. ഡ്രൈവറെ നിയമനടപടികൾക്കായി കൈമാറിയിട്ടുണ്ട് എന്നും അദ്ദേഹം കൂട്ടിച്ചേർത്തു. ഗുരുതരമായി പരിക്കേറ്റ വയോധികനെ ആശുപത്രിയിൽ പ്രവേശിപ്പിച്ചിരിക്കുകയാണ്.
