ക്സ്പോ സിറ്റി ദുബായുടെ ഹൃദയഭാഗത്ത് സ്ഥിതി ചെയ്യുന്ന അൽ വാസൽ ഡോമിന് ഗിന്നസ് വേൾഡ് റെക്കോർഡിന്റെ തിളക്കം. ലോകത്തിലെ ഏറ്റവും വലിയ ഇന്ററാക്ടീവ് ഇമ്മേഴ്സീവ് ഡോമെന്ന നേട്ടമാണ് അൽ വാസലിനെ ലോക റെക്കോർഡ് നേട്ടത്തിലേക്ക്‌ എത്തിച്ചത്. ഈ ഡോമിന് അർദ്ധസുതാര്യമായ 360 ഡിഗ്രി ഘടനയാണുള്ളത്.
അൽ വാസൽ പ്ലാസ വാസ്തുവിദ്യാ മികവ് പ്രതിധ്വനിക്കുന്ന ഒരു വിശിഷ്ട ഘടനയുടെ തെളിവാണ്. മാത്രമല്ല, എക്സ്പോ 2020-ന്റെയും തുടർന്നുള്ള എക്സ്പോ സിറ്റി ദുബായിയുടെയും നവീകരണത്തിനും മികവിനും ഗിന്നസ് വേൾഡ് റെക്കോർഡിലെ ഈ അംഗീകാരം അടിവരയിടുന്നുണ്ട് എന്നും ഗിന്നസ് വേൾഡ് റെക്കോർഡ്സിലെ ഔദ്യോഗിക വിധികർത്താവ് അൽവലീദ് ഉസ്മാൻ പറഞ്ഞു.
അതേസമയം നേട്ടം കൈവരിച്ചതോടെ അൽ വാസൽ ഡോം ലോക റെക്കോർഡ് ബുക്കിൽ ഇടംപിടിച്ചതിന്റെ അടയാളപ്പെടുത്തുന്ന പരിപാടികളുടെ കലണ്ടറും എക്സ്പോ സിറ്റി ദുബായ് പുറത്തിറക്കിയിട്ടുണ്ട്. സാംസ്കാരിക ഉത്സവങ്ങൾ, അറബിക് ഫ്യൂഷൻ വിഭവങ്ങൾ വിളമ്പുന്ന ഒരു പുതിയ കഫേ, സന്ദർശകർക്ക് അവരുടെ മൊബൈൽ ഫോൺ ഉപയോഗിച്ച് ഡോമിൽ ഇന്ററാക്ടീവ് അനുഭവങ്ങൾ പങ്കുവയ്ക്കുന്നതിനുള്ള സംവിധാനങ്ങളും ഒരുക്കി അൽ വാസൽ ഡോം ആളുകളെ ഒരുമിച്ച് കൊണ്ടുവരുന്നത് തുടരുമെന്ന് എക്സ്പോ സിറ്റി ദുബായ് ഇവന്റ് ആൻഡ് എന്റർടൈൻമെന്റ് എക്സിക്യൂട്ടീവ് ക്രിയേറ്റീവ് ഡയറക്ടർ അംന അബുൽഹൂൾ പറഞ്ഞു.
