ഏകദിന റാങ്കിങ്ങിൽ മുന്നിലെത്തി ഇന്ത്യ. ഏകദിന പരമ്പരയിലെ ആദ്യ മത്സരത്തിൽ ഓസീസിനെ പരാജയപ്പെടുത്തിയതിന് പിന്നാലെയാണ് ഏകദിന റാങ്കിങ്ങിൽ ഇന്ത്യ ഒന്നാം സ്ഥാനം സ്വന്തമാക്കിയത്. ഏകദിന റാങ്കിങ്ങിന് പുറമെ ടെസ്റ്റ് – ട്വന്റി 20 റാങ്കിങ്ങിലും ഒന്നാം സ്ഥാനത്ത് ടീം ഇന്ത്യ തന്നെയാണ്. ഇതോടെ മൂന്ന് ഫോർമാറ്റിലും ഒന്നാം റാങ്ക് എന്ന നേട്ടം ഇന്ത്യ സ്വന്തമാക്കി.
പാക്കിസ്ഥാൻ കൈവശം വെച്ചിരുന്ന ഏകദിന റാങ്കിങ്ങാണ് ഇതോടെ ഇന്ത്യ സ്വന്തമാക്കിയത്. 116 പോയന്റോടെയാണ് ഇന്ത്യ പാക്കിസ്ഥാനെ മറികടന്നത്. പാക്കിസ്ഥാന് 115 പോയിന്റാണുള്ളത്. 111 പോയിന്റുമായി ഓസ്ട്രേലിയ ആണ് മൂന്നാം സ്ഥാനത്ത്. ട്വന്റി 20 റാങ്കിങ്ങിൽ 264 പോയന്റോടെയാണ് ഇന്ത്യ ഒന്നാം സ്ഥാനത്ത് നിൽക്കുന്നത്. ഇത് രണ്ടാം തവണയാണ് ഒരു ടീം മൂന്നു ഫോർമാറ്റിലും ഒന്നാമതെത്തുന്നത്. 2012-ൽ ദക്ഷിണാഫ്രിക്കയാണ് ഈ നേട്ടം കൈവരിച്ചിരുന്നത്.
