ജനപ്രിയ നായകൻ ദിലീപിനെ നായകനാക്കി റാഫി രചനയും സംവിധാനവും നിര്‍വ്വഹിച്ച വോയ്സ് ഓഫ് സത്യനാഥന്‍ യുഎഇ, ജിസിസി റിലീസിനൊരുങ്ങുന്നു. ആറ് രാജ്യങ്ങളിലായി 87 സ്ക്രീനുകളില്‍ വ്യാഴാഴ്ചയാണ് (ഓഗസ്റ്റ് 3) ചിത്രം പ്രദര്‍ശിപ്പിക്കുക. കേരളത്തില്‍ ജൂലൈ 28നായിരുന്നു ചിത്രം റിലീസ് ചെയ്തത്. ആദ്യ ദിനം പോസിറ്റീവ് അഭിപ്രായം നേടിയ ചിത്രം വാരാന്ത്യ കളക്ഷനിലും വലിയ നേട്ടമുണ്ടാക്കിയിരുന്നു.
വെള്ളിയാഴ്ച 1.8 കോടി ആയിരുന്നു ചിത്രത്തിന്റെ കളക്ഷനെങ്കില്‍ ശനിയാഴ്ച ഇത് 2.05 കോടിയും ഞായറാഴ്ച 2.55 കോടിയുമാണ് നേടിയത്. മൂന്ന് ദിവസം കൊണ്ട് ആകെ 6.40 കോടി ചിത്രം നേടി. ഇത് കേരളത്തിലെ മാത്രം കണക്കാണ്. അതേസമയം കേരളമൊഴികെ രാജ്യത്തെ മറ്റ് സംസ്ഥാനങ്ങളിലെ റിലീസ് കേന്ദ്രങ്ങളില്‍ നിന്ന് മൂന്ന് ദിവസങ്ങളിലായി 40 ലക്ഷവും ചിത്രം നേടിയതായി ബോക്സ് ഓഫീസ് ട്രാക്കര്‍മാര്‍ അറിയിച്ചു. ഇന്ത്യയില്‍ നിന്ന് ചിത്രം ആദ്യ വാരാന്ത്യം നേടിയിരിക്കുന്നത് 6.80 കോടിയാണ്. മലയാളത്തില്‍ നിന്ന് അധികം എതിരാളികള്‍ ഇല്ലാത്തതിനാല്‍ തന്നെ ചിത്രം മുന്നോട്ടുള്ള ദിനങ്ങളിലും ബോക്സ് ഓഫീസില്‍ നേട്ടമുണ്ടാക്കുമെന്നാണ് വിലയിരുത്തുന്നത്.
ജോജു ജോർജ്, അലൻസിയർ ലോപ്പസ്, ജഗപതി ബാബു, അനുപം ഖേർ, മകരന്ദ് ദേശ്പാണ്ഡെ, ജാഫർ സാദ്ദിഖ് (വിക്രം ഫൈയിം), സിദ്ദിഖ്, ജോണി ആന്റണി, രമേശ് പിഷാരടി, ബെന്നി പി നായരമ്പലം, ജനാർദ്ദനൻ, ബോബൻ സാമുവൽ, ഫൈസൽ, ഉണ്ണിരാജ, വീണ നന്ദകുമാർ, സ്മിനു സിജോ, അംബിക മോഹൻ, അതിഥി താരമായി അനുശ്രീ എന്നിവരാണ് ചിത്രത്തിലെ മറ്റ് പ്രധാന കഥാപാത്രങ്ങളെ അവതരിപ്പിച്ചിരിക്കുന്നത്. ബാദുഷ സിനിമാസിന്റെയും ഗ്രാന്റ് പ്രൊഡക്ഷൻസിന്‍റെയും ബാനറിൽ എൻ എം ബാദുഷ, ഷിനോയ് മാത്യു, ദിലീപ്, രാജൻ ചിറയിൽ എന്നിവർ ചേർന്നാണ് ചിത്രത്തിന്റെ നിർമാണം.
