അറബ് രാജ്യങ്ങളിലെ ഇന്ത്യക്കാരുടെ എണ്ണം ഒമ്പത് ദശലക്ഷമായെന്ന് വിദേശകാര്യ സഹമന്ത്രി വി മുരളീധരൻ. അതേസമയം, അറബ് രാജ്യങ്ങളുമായുള്ള ഇന്ത്യയുടെ വ്യാപാരം 240 ബില്യൺ ഡോളർ കവിഞ്ഞുവെന്നും അദ്ദേഹം വ്യക്തമാക്കി ന്യൂഡൽഹിയിൽ ആറാമത് ഇന്ത്യ-അറബ് പങ്കാളിത്ത സമ്മേളനം ഉദ്ഘാടനം ചെയ്തുകൊണ്ട് സംസാരിക്കുകയായിരുന്നു അദ്ദേഹം.
2008 ഡിസംബറിൽ അറബ് ലീഗും ഇന്ത്യയും തമ്മിൽ ഒപ്പുവെച്ച സഹകരണ മെമ്മോറാണ്ടത്തിന്റെ അനന്തരഫലമാണ് സമ്മേളനം. മെമ്മോറാണ്ടം അറബ് ഇന്ത്യൻ സഹകരണ ഫോറം സ്ഥാപിച്ചു.ഇന്ത്യ-അറബ് പങ്കാളിത്ത സമ്മേളനം ഇന്ത്യയിലും ഒരു അറബ് രാജ്യത്തും മാറിമാറി നടക്കുന്നു. അറബ് രാജ്യങ്ങളിലെയും ഇന്ത്യയിലെയും മന്ത്രിമാരും മുതിർന്ന ഉദ്യോഗസ്ഥരും വ്യവസായികളും പങ്കെടുക്കുന്നുണ്ട്.
“നിക്ഷേപം, വ്യാപാരം, സേവനങ്ങൾ എന്നിവയിലെ പുതിയ ചക്രവാളങ്ങൾ” എന്നതായിരുന്നു ഈ വർഷത്തെ സമ്മേളനത്തിന്റെ വിഷയം. ഇന്ത്യൻ വിദേശകാര്യ മന്ത്രാലയവും അറബ് ലീഗിന്റെ ജനറൽ സെക്രട്ടേറിയറ്റും ചേർന്ന് സംഘടിപ്പിക്കുന്ന ഇത് ഫെഡറേഷൻ ഓഫ് ഇന്ത്യൻ ചേമ്പേഴ്‌സ് ഓഫ് കൊമേഴ്‌സ് ആന്റ് ഇൻഡസ്ട്രി, ഫെഡറേഷൻ ഓഫ് അറബ് ബിസിനസുകാർ, യൂണിയൻ ഓഫ് അറബ് ചേംബേഴ്‌സ് എന്നിവ ഈ വർഷം പങ്കാളികളായി.
