മഹ്‌സൂസ് നറുക്കെടുപ്പിൽ അബുദാബിയിലെ ഓഫീസ് ബോയ്ക്ക്‌ ഒരു മില്യൺ ദിർഹം സമ്മാനം. ഓഫീസ് ബോയ് ആയി ജോലി നോക്കുന്ന മേഖ് കഴിഞ്ഞ എട്ട് വർഷമായി അബുദാബിയിലാണ് താമസിക്കുന്നത്. ജോലി ചെയ്യുന്നതിനാൽ ശനിയാഴ്ച ഫലം പരിശോധിക്കാൻ കഴിഞ്ഞിരുന്നില്ല. സുഹൃത്താണ് വിജയിച്ചുവെന്ന് പറഞ്ഞ് ഫോൺ ചെയ്തതെന്ന് നേപ്പാൾ സ്വദേശിയായ മേഖ് പറഞ്ഞു. എന്നാൽ ഇത് ആദ്യം വിശ്വസിച്ചില്ല. തുടർന്ന് മഹ്‌സൂസ് അക്കൗണ്ടും പേരും റാഫിൾ ഐഡി നമ്പറും കാണിച്ച നറുക്കെടുപ്പിന്റെ വീഡിയോയും പരിശോധിച്ചതിന് ശേഷമാണ് വിശ്വാസമായത്.
2022-ൽ 10 മില്യൺ ദിർഹം നേടിയ നറുക്കെടുപ്പിലെ ആദ്യ നേപ്പാളിലെ കോടീശ്വരനായ ഭാരതിന് പിന്നാലെയാണ് മേഖും സമ്മാനം നേടുന്നത്. ഒരു സ്വകാര്യ കമ്പനിയിൽ ജോലി ചെയ്യുന്ന മേഖ് മഹ്‌സൂസിന്റെ നാലാമത്തെ കോടീശ്വരനായ നേപ്പാളി സ്വദേശിയാണ്. രണ്ട് കുട്ടികളുടെ പിതാവായ മേഖ് കുടുംബത്തിന്റെ ഭാവിക്ക് വേണ്ടിയായിരിക്കും ഈ പണം ചിലവാക്കുക.
കുട്ടികളുടെ ഭാവി സുരക്ഷിതമാക്കാനും ഒരു വീട് പണിയാനും നേപ്പാളിൽ ഒരു ചെറുകിട ബിസിനസ് സംരംഭം തുടങ്ങാനും ഈ വിജയം ഉപയോഗിക്കാൻ പദ്ധതിയിടുന്നുവെന്നും മേഖ് കൂട്ടിച്ചേർത്തു. 35 ദിർഹത്തിന് ഒരാൾക്ക് ഒരു കുപ്പി മഹ്‌സൂസ് വെള്ളം വാങ്ങാൻ കഴിയും. കൂടാതെ എല്ലാ ശനിയാഴ്ചയും പ്രതിവാര നറുക്കെടുപ്പിൽ പങ്കെടുക്കാനുള്ള അവസരവുമുണ്ട്. ശനിയാഴ്ച മഹ്‌സൂസ് 1,119 പങ്കാളികൾക്ക് സമ്മാനത്തുകയായി 475,500 ദിർഹം സമ്മാനിച്ചു.
