20 കാരനായ ആരാധകനെ വീട്ടിൽ മരിച്ച നിലയിൽ കണ്ടെത്തിയ സംഭവത്തിൽ ആന്ധ്രാപ്രാദേശിൽ പ്രതിഷേധം ശക്തം. തെലുങ്ക് യുവ താരം ജൂനിയർ എൻടിആറിന്റെ കടുത്ത ആരാധകനായ ശ്യാമിന്റെ മരണത്തിലാണ് സോഷ്യൽ മീഡിയക്ക് അകത്തും പുറത്തുമായി പ്രതിഷേധം ശക്തമാവുന്നത്. ശ്യാമിന്റേത് ആത്മഹത്യയല്ലെന്നും മരണത്തിൽ അസ്വാഭാവികതയുണ്ടെന്നും ആരോപിച്ചാണ് പ്രതിഷേധം. നീതിയുക്തമായ അന്വേഷണം നടത്തണം എന്ന് ആവശ്യപ്പെട്ട് ജൂനിയർ എൻ.ടിആർ തന്നെ രംഗത്തെത്തുകയും ചെയ്തു.
ജൂൺ 25-ന് രാവിലെയാണ് കോമസീമയിലെ സ്വവസതിയിൽ ശ്യാമിനെ മരിച്ച നിലയിൽ കണ്ടെത്തിയത്. ആത്മഹത്യയാണെന്നാണ് പ്രാഥമിക നിഗമനം. എന്നാൽ സുഹൃത്തുക്കളും ബന്ധുക്കളും ഈ വാദം തള്ളിക്കളയുകയാണ്. കൂടാതെ ശ്യാമിന്റെ മരണം അഗാധമായ ദുഃഖത്തിലാക്കിയെന്ന് ജൂനിയർ എൻടിആർ പുറത്തിറക്കിയ പ്രസ്താവനയിൽ പറയുന്നു. ശ്യാമിന്റെ മരണം ഏത് സാഹചര്യത്തിലാണ് സംഭവിച്ചതെന്ന് വ്യക്തമല്ല. ഇക്കാര്യം ഉടൻ അന്വേഷിക്കണമെന്ന് സർക്കാർ അധികൃതരോട് അഭ്യർത്ഥിക്കുന്നുവെന്നും അദ്ദേഹം പറഞ്ഞു.
ജൂനിയർ എൻടിആർ പങ്കെടുക്കാറുള്ള എല്ലാ പൊതുചടങ്ങുകളിലേയും സാന്നിധ്യമായിരുന്നു ശ്യാം. ഈയിടെ ദാസ് കാ ധാംകി എന്ന ചിത്രത്തിന്റെ പ്രൊമോഷൻ ചടങ്ങിന് അതിഥിയായെത്തിയ എൻ.ടി.ആറിനടുത്തേക്ക് സുരക്ഷാ ഉദ്യോഗസ്ഥരുടെ വലയം ഭേദിച്ച് എത്തുന്ന ശ്യാമിന്റെ വീഡിയോയും ശ്യാം ട്വീറ്റ് ചെയ്തിരുന്നു. സുരക്ഷാ ഉദ്യോഗസ്ഥരെ അനുനയിപ്പിച്ച് ശ്യാമിനൊപ്പം ഫോട്ടോയ്ക്ക് പോസ് ചെയ്യുന്ന താരത്തെയും ഈ വീഡിയോയിൽ കാണാം.
അതേസമയം ജൂനിയർ എൻടിആറിന് പുറമേ നടന്മാരായ പവൻ കല്യാൺ, സംവിധായകൻ മാരുതി, നിഖിൽ സിദ്ധാർത്ഥ തുടങ്ങിയ ചലച്ചിത്ര പ്രവർത്തകരും ശ്യാമിന്റെ മരണത്തിനു പിന്നിലെ ദുരൂഹത നീക്കണമെന്നാവശ്യപ്പെട്ട് രംഗത്ത് വന്നിട്ടുണ്ട്. കൂടാതെ വി വാണ്ട് ജസ്റ്റിസ് ഫോർ ശ്യാം എൻടിആർ എന്ന ഹാഷ് ടാഗ് ക്യാമ്പെയ്നും ട്വിറ്റർ കേന്ദ്രീകരിച്ച് നടക്കുന്നുണ്ട്.
