അറബിക്കടലിൽ രൂപംകൊണ്ട ബിപോർജോയ് ചുഴലിക്കാറ്റിന്റെ പശ്ചാത്തലത്തിൽ ഒമാനിൽ ദേശീയ കാലാവസ്ഥാ കേന്ദ്രം ജാഗ്രതാ നിർദേശം നൽകി. ജൂൺ 13 വരെ അറബിക്കടലിന്റെ തീരദേശങ്ങളിൽ കടൽ പ്രക്ഷുബ്ധമാകാൻ സാധ്യതയുള്ളതിനാലാണ് തീരപ്രദേശങ്ങളിൽ താമസിക്കുന്നവർക്ക് ജാത്രതാ നിർദേശം നൽകിയത്.
ചുഴലിക്കാറ്റിന്റെ ഭാഗമായി ഇന്ന് മുതൽ ജൂൺ 13 വരെ ഒമാനിൽ മേഘാവൃതമായ കാലാവസ്ഥയായിരിക്കുമെന്ന് ദേശീയ കാലാവസ്ഥാ കേന്ദ്രം അറിയിച്ചു. ഇന്നും നാളെയും അറബിക്കടലിന്റെ തീരപ്രദേശങ്ങളിൽ 4 മുതൽ 6 വരെ മീറ്റർ ഉയരമുള്ള തിരമാലകൾക്കും 13-ന് 3 മുതൽ 5 മീറ്റർ വരെ ഉയരത്തിലുള്ള തിരമാലകൾക്കും സാധ്യതയുള്ളതായി കാലാവസ്ഥാ കേന്ദ്രം അറിയിച്ചു. അതിനാൽ തീരദേശവാസികൾ ജാഗ്രത പാലിക്കണമെന്നും അധികൃതർ നിർദേശിച്ചിട്ടുണ്ട്.
ഇപ്പോൾ ചുഴലിക്കാറ്റ് അറബിക്കടലിൽ അക്ഷാംശം 16.5 വടക്ക്, രേഖാംശം 67.4 കിഴക്ക് എന്ന ദിശയിലാണ് സ്ഥിതി ചെയ്യുന്നത്. ഈ മേഖല ഒമാൻ തീരത്ത് നിന്ന് ഏതാണ്ട് 1050 കിലോമീറ്റർ ദൂരെയാണ്. ചുഴലിക്കാറ്റിന്റെ മധ്യഭാഗത്തായി മണിക്കൂറിൽ 65 മുതൽ 80 നോട്ട് വരെ വേഗതയിൽ കാറ്റ് അനുഭവപ്പെടാൻ സാധ്യതയുള്ളതായും വിലയിരുത്തപ്പെടുന്നുണ്ട്.
