കേരളത്തിൽ നിന്നുള്ള ആദ്യ ഹജ്ജ് സംഘം ഞായറാഴ്ച സൗദിയിലെത്തി. കണ്ണൂരിൽ നിന്ന് പുറപ്പെട്ട കേരളത്തിലെ ഹജ്ജ് വിമാനം സൗദി സമയം പുലർച്ചെ നാലരയ്ക്കാണ് ജിദ്ദയിലെത്തിയത്. 145 തീർഥാടകരാണ് ആദ്യ സംഘത്തിലുണ്ടായിരുന്നത്. ഇമിഗ്രേഷൻ നടപടിക്രമങ്ങളെല്ലാം വേഗത്തിൽ പൂർത്തിയാക്കിയതിന് ശേഷം ജിദ്ദയിൽ നിന്നും പുറപ്പെട്ട സംഘം എട്ട് മണിയോടെ മക്കയിലെ അസീസിയയിലുള്ള താമസ സ്ഥലത്തെത്തി. ഇവർക്ക് മക്കയിലെ ഹജ്ജ് സർവീസ് ഏജൻസിയുടെയും മലയാളി സംഘടനകളുടെയും നേതൃത്വത്തിൽ വലിയ സ്വീകരണമാണ് നൽകിയത്.
പ്രാർഥനയോടെയാണ് ഹജ്ജ് സർവീസ് ഏജൻസി പ്രതിനിധികൾ തീർഥാടകരെ മക്കയിൽ സ്വീകരിച്ചത്. അതേസമയം മികച്ച സേവനങ്ങളും സൗകര്യങ്ങളും അനുഭവിച്ച് പുണ്യഭൂമിയിൽ ഹജ്ജ് കർമത്തിനായി എത്തിയ സന്തോഷത്തിലാണ് കേരളത്തിലെ തീർഥാടകർ. കെഎംസിസി, ഒഐസിസി, ആർഎസ്സി, വിക്കായ, നവോദയ, തനിമ തുടങ്ങിയ മലയാളി സന്നദ്ധ സംഘടനാ പ്രതിനിധികളും തീർഥാടകരെ സ്വീകരിക്കാൻ മക്കയിൽ ഉണ്ടായിരുന്നു. കണ്ണൂരിൽ നിന്ന് ഒന്നും കോഴിക്കോട് നിന്ന് രണ്ടും ഹജ്ജ് വിമാനങ്ങളാണ് ഇന്ന് സർവീസ് നടത്തിയത്.
