സിനിമയിലെത്തി ചുരുങ്ങിയ കാലം കൊണ്ട് തന്‍റേതായ സ്ഥാനം ഉറപ്പിച്ച താരമാണ് കീർത്തി സുരേഷ്. നിർമാതാവായ സുരേഷ് കുമാറിന്‍റേയും നടി മേനകയുടേയും മകളായ കീർത്തി ബാലതാരമായാണ് സിനിമയിലേക്ക്‌ പ്രവേശിക്കുന്നത്. മലയാളിയാണെങ്കിലും ടോളിവുഡിലൂടെയാണ് കീർത്തി പ്രേക്ഷക ശ്രദ്ധ നേടുന്നത്. വിക്രം ഉള്‍പ്പടെയുള്ള മുൻനിര താരങ്ങള്‍ക്കൊപ്പം നടി അഭിനയിച്ചിട്ടുണ്ട്. ഇപ്പോഴിതാ കീർത്തിയെക്കുറിച്ച് നിർമാതാവ് ബോണി കപൂർ പറഞ്ഞ വാക്കുകളാണ് വൈറലാകുന്നത്. ബോണി കപൂറിന്റെ ഭാര്യയും നടിയുമായ ശ്രീദേവിയുമായി ബന്ധപ്പെടുത്തിയായിരുന്നു ബോണി കപൂറിന്റെ പരാമർശം.
ശ്രീദേവിയെ പോലെ തന്നെ സൗന്ദര്യവും കഴിവുമുള്ള നടിയാണ് കീർത്തി സുരേഷ് എന്നായിരുന്നു ബോണി കപൂർ അഭിപ്രായപ്പെട്ടത്. ‘മാമന്നൻ’ എന്ന സിനിമയുടെ ഓഡിയോ ലോഞ്ചിനോടനുബന്ധിച്ചാണ് ബോണി കപൂർ ഇത്തരമൊരു പരാമർശം നടത്തിയത്. ബോളിവുഡിൽ വലിയ കോളിളക്കം സൃഷ്ടിച്ച വിവാഹമായിരുന്നു ബോണിയുടെയും നടി ശ്രീദേവിയുടെയും.
ദിലീപ് നായകനായെത്തിയ ‘കുബേരൻ’ എന്ന മലയാള ചിത്രത്തിലൂടെ ബാലതാരമായാണ് കീര്‍ത്തി സുരേഷ് സിനിമയിലെത്തിയത്. ഗീതാഞ്ജലി എന്ന ചിത്രത്തിലൂടെ ആദ്യമായി നായികയായി അരങ്ങേറ്റം കുറിക്കുകയും ചെയ്തു. മഹാനടി എന്ന ചിത്രത്തിലെ ഗംഭീര പ്രകടനത്തിന് മികച്ച നടിക്കുള്ള ദേശീയ പുരസ്കാരവും താരം സ്വന്തമാക്കിയിരുന്നു. ഇപ്പോള്‍ വിവിധ ഭാഷകളിലായി നിരവധി ചിത്രങ്ങൾ താരത്തെ തേടിയെത്തുന്നുണ്ട്.
മാരി സെൽവരാജ് സംവിധാനം ചെയ്യുന്ന ചിത്രമാണ് ‘മാമന്നന്‍’. ഉദയനിധി സ്റ്റാലിൻ നായകനായെത്തുന്ന ചിത്രത്തിൽ വില്ലൻ വേഷത്തിലെത്തുന്നത് ഫഹദ് ഫാസിലാണ്. എ.ആർ. റഹ്മാനാണ് ചിത്രത്തിന്റെ സംഗീത സംവിധാനം. തേനി ഈശ്വർ ഛായാഗ്രഹണം നിര്‍വഹിക്കുന്ന സിനിമയില്‍ വടിവേലുവും ശക്തമായ ഒരു കഥാപാത്രത്തെ അവതരിപ്പിക്കുന്നുണ്ട്.
