2021-23 ലോക ടെസ്റ്റ് ചാമ്പ്യൻഷിപ്പ് ജേതാക്കൾക്കുള്ള സമ്മാനത്തുക പ്രഖ്യാപിച്ച് അന്താരാഷ്ട്ര ക്രിക്കറ്റ് കൗൺസിൽ . കിരീടം നേടുന്ന ടീമിന് 1.6 മില്യൺ ഡോളറും (ഏകദേശം 13 കോടി രൂപ) രണ്ടാം സ്ഥാനക്കാരായ ടീമിന് എട്ട് ലക്ഷം ഡോളറുമാണ് (ഏകദേശം 6.5 കോടി രൂപ) സമ്മാനമായി നൽകുക. കിരീടപ്പോരാട്ടത്തിൽ ഇന്ത്യയുടെ എതിരാളികൾ ഓസ്‌ട്രേലിയയാണ്. ലോക ടെസ്റ്റ് ചാമ്പ്യൻഷിപ്പ് ഫൈനൽ അടുത്ത മാസം ഏഴ് മുതൽ ലണ്ടനിലെ ഓവൽ ഗ്രൗണ്ടിലായിരിക്കും നടക്കുക.
2021-23 ലോക ടെസ്റ്റ് ചാമ്പ്യൻഷിപ്പിന്റെ ആകെയുള്ള സമ്മാനത്തുക 3.8 മില്യൺ ഡോളറാണ് (ഏകദേശം 31.4 കോടി രൂപ). ഇത് ഒൻപത് ടീമുകൾക്ക്‌ നൽകാനായി വിഭജിക്കും. മൂന്നാം സ്ഥാനത്തുള്ള ദക്ഷിണാഫ്രിക്കൻ ടീമിന് 3.5 കോടി രൂപയും നാലാം സ്ഥാനത്തുള്ള ഇംഗ്ലണ്ടിന് 2.8 കോടി രൂപയുമാണ് ലഭിക്കുക. ശ്രീലങ്കയാണ് അഞ്ചാം സ്ഥാനത്തുള്ളത്. ടീമിന് 1.6 കോടി രൂപയാണ് സമ്മാനമായി നൽകുക. പാകിസ്ഥാൻ, ന്യൂസിലൻഡ്, വെസ്റ്റ് ഇൻഡീസ്, ബംഗ്ലാദേശ് എന്നിവർക്ക് യഥാക്രമം 82-82 ലക്ഷം രൂപയും സമ്മാനത്തുകയായി ലഭിക്കും. 2019-21 ലെ ഐസിസി ലോക ടെസ്റ്റ് ചാമ്പ്യൻഷിപ്പിന്റെ സമ്മാനത്തുകയും ഇതായിരുന്നു.
