കേരള മുഖ്യമന്ത്രി പിണറായി വിജയന് പിറന്നാള്‍ ആശംസ നേര്‍ന്ന് തമിഴ്നാട് മുഖ്യമന്ത്രി എംകെ സ്റ്റാലിന്‍. മലയാളത്തിലാണ് സ്റ്റാലിൻ ആശംസകൾ അറിയിച്ചത്. ‘ബഹുമാനപ്പെട്ട കേരള മുഖ്യമന്ത്രിയും പ്രിയ സഖാവുമായ തിരു. പിണറായി വിജയന് പിറന്നാള്‍ ആശംസകള്‍. സമഗ്ര പ്രയത്നം കൊണ്ട് കേരളത്തിന്റെ വിജയ ഗാഥ രചിക്കുന്ന മഹത് വ്യക്തിത്വത്തിന് ആരോഗ്യവും ഉണ്ടാകട്ടെയെന്ന് സ്റ്റാലിന്‍ കുറിച്ചു.
അതേസമയം മുഖ്യമന്ത്രി പിണറായി വിജയന്റെ 78-ാം പിറന്നാൾ ദിനത്തില്‍ ആശംസകളുമായി സിനിമാതാരങ്ങളും രാഷ്ട്രീയ പ്രമുഖരുമടക്കം നിരവധി പേർ രംഗത്തെത്തി. ബഹുമാനപ്പെട്ട മുഖ്യമന്ത്രി ശ്രീ പിണറായി വിജയന് ഹൃദയം നിറഞ്ഞ ജന്മദിനാശംസകൾ എന്ന് മുഖ്യമന്ത്രിക്കൊപ്പമുള്ള ചിത്രം പങ്കുവെച്ചുകൊണ്ട് മമ്മൂട്ടി കുറിച്ചു. ബഹുമാനപ്പെട്ട കേരള മുഖ്യമന്ത്രി ശ്രീ പിണറായി വിജയന് ഹൃദയം നിറഞ്ഞ ജന്മദിനാശംസകൾ എന്ന് മോഹന്‍ലാലും കുറിച്ചു. ‘കരുത്തോടെ നേരുകാക്കുന്ന സഖാവിന്‌ ജന്മദിനാശംസകൾ’ എന്നാണ് പൊതു മരാമത്ത് മന്ത്രി മുഹമ്മദ് റിയാസ് കുറിച്ചത്.
