യുവനടിയെ പീഡിപ്പിച്ച കേസിൽ നടനും നിർമ്മാതാവുമായ വിജയ് ബാബുവിനെ അറസ്റ്റ് ചെയ്തു. എറണാകുളം സൗത്ത് പൊലീസാണ് അറസ്റ്റ് രേഖപ്പെടുത്തിയത്. മുൻകൂർ ജാമ്യ വ്യവസ്ഥകൾ പ്രകാരം ജാമ്യത്തിൽ വിട്ടയക്കും.
ഇന്ന് മുതൽ ജൂലൈ 3 വരെ രാവിലെ 9 മണി മുതൽ വൈകിട്ട് 6 മണി വരെ അന്വേഷണ സംഘത്തിന്റെ കസ്റ്റഡിയിൽ ഉണ്ടായിരിക്കണം എന്നാണ് കോടതിയുടെ നിർദേശം. കേസിൽ ചോദ്യംചെയ്യലും തെളിവെടുപ്പും ഈ ദിവസങ്ങളിൽ നടക്കും.
അന്വേഷണ സംഘത്തിന് അറസ്റ്റ് രേഖപെടുത്താമെന്ന് കോടതി ജാമ്യം നൽകുമ്പോൾ പറഞ്ഞതിന്റെ അടിസ്ഥാനത്തിലാണ് അറസ്റ്റ്. അറസ്റ്റ് രേഖപ്പെടുത്തിയാൽ 5 ലക്ഷം രൂപ കെട്ടിവെച്ച് 2 ആൾ ജാമ്യവും ഉണ്ടെങ്കിൽ ജാമ്യം അനുവദിക്കണമെന്ന് കോടതി വ്യവസ്ഥയിൽ നിർദേശിച്ചിരുന്നു.
ഏപ്രിൽ 22നാണ് യുവനടി വിജയ് ബാബുവിനെതിരെ പീഡന പരാതി നൽകുന്നത്. പിന്നീട് ഒളിവിൽ പോയ വിജയ് ബാബു ദുബായിൽ നിന്ന് 39 ദിവസത്തിന് ശേഷമാണ് തിരിച്ചെത്തിയത്.
