സിനിമാ പ്രേക്ഷകർ കാത്തിരിക്കുന്ന പ്രഭാസിന്റെ ബ്രഹ്മാണ്ഡ ചിത്രം ‘സലാർ’ന്റെ ട്രെയിലർ പുറത്തിറങ്ങി. പ്രഭാസും പൃഥ്വിരാജും ഒന്നിക്കുന്ന ചിത്രമായതിനാൽ വലിയ പ്രതീക്ഷയിലാണ് ആരാധകർ. രണ്ട് സുഹൃത്തുക്കളുടെ സൗഹൃദമാണ് ചിത്രത്തിലൂടെ പങ്കുവെയ്ക്കുന്നതെന്ന് അണിയറ പ്രവർത്തകർ വ്യക്തമാക്കി.
വരധരാജ മന്നാർ എന്ന കഥാപാത്രമായാണ് പൃഥ്വിരാജ് ചിത്രത്തിലെത്തുന്നത്. സലാർ എന്ന കഥാപാത്രമായി പ്രഭാസും സ്ക്രീനിലെത്തും. ശ്രുതി ഹാസനാണ് ചിത്രത്തിലെ നായിക. രണ്ട് ഭാഗങ്ങളായെത്തുന്ന സിനിമയുടെ ആദ്യ ഭാഗത്തിന്റെ പേര് സലാർ: പാർട് വൺ സീസ് ഫയർ എന്നാണ്. ജഗപതി ബാബു, ഈശ്വരി റാവു എന്നിവരാണ് മറ്റ് പ്രധാന വേഷങ്ങളിൽ എത്തുന്നത്.
പ്രശാന്ത് നീൽ ആണ് സലാറിന്റെ സംവിധായകൻ. കെജിഎഫ്, കാന്താര എന്നീ സൂപ്പർ ഹിറ്റ് ചിത്രങ്ങൾക്ക് ശേഷം ഹോംബാലെ ഫിലിംസിന്റെ ബാനറിൽ വിജയ് കിരണ്ടൂർ നിർമ്മിക്കുന്ന ചിത്രമാണ് സലാർ. ചിത്രം ഡിസംബർ 22ന് തിയറ്ററുകളിലെത്തും.
