മുഖ്യമന്ത്രിയുടെ ദുരിതാശ്വാസ നിധി ദുരുപയോഗം ചെയ്‌തെന്ന കേസ് ഫുൾ ബെഞ്ചിനു വിട്ട ലോകായുക്ത വിധി ചോദ്യം ചെയ്തുള്ള ഹർജിയിൽ അടിയന്തരമായി ഇടപെടാൻ വിസമ്മതിച്ച്‌ ഹൈക്കോടതി. മുഖ്യമന്ത്രിയുടെ ദുരിതാശ്വാസ നിധിയിൽനിന്ന് എൻസിപി നേതാവ് ഉഴവൂർ വിജയന്റെ കുടുംബത്തിന് 25 ലക്ഷം അനുവദിച്ചതും മുൻ ചെങ്ങന്നൂർ എംഎൽഎ കെ.കെ.രാമചന്ദ്രൻ നായരുടെ കുടുംബത്തിന് എട്ടര ലക്ഷം അനുവദിച്ചതും സിപിഎം മുൻ സംസ്ഥാന സെക്രട്ടറി കോടിയേരി ബാലകൃഷ്ണന് അകമ്പടി പോയ വാഹനം അപകടത്തിൽപ്പെട്ട് മരിച്ച പൊലീസുകാരന്റെ കുടുംബത്തിന് 20 ലക്ഷം നൽകിയതും അഴിമതിയും സ്വജനപക്ഷപാതവുമാണെന്നാണ് കേസ്.
ലോകായുക്തയിലെ പരാതിക്കാരനായ ആർഎസ് ശശികുമാർ നൽകിയ ഹർജി ചീഫ് ജസ്റ്റിസ് എസ്‌വി ഭട്ടിയുടെ നേതൃത്വത്തിലുള്ള ബെഞ്ച് ജൂൺ ഏഴിലേക്കു മാറ്റി. ജൂൺ ആറിനാണ് ലോകായുക്ത ഫുൾ ബെഞ്ച് കേസ് പരിഗണിക്കുന്നത്.
ഫുൾ ബെഞ്ചിനു വിട്ട വിധിക്കെതിരെ നൽകിയ പുനപ്പരിശോധനാ ഹർജിയും തള്ളിയ സാഹചര്യത്തിലാണ് പരാതിക്കാരൻ ഹൈക്കോടതിയിൽ എത്തിയത്. അടിസ്ഥാനമില്ലാത്തതും ദുർബലവുമായ വാദമാണ് ഹർജിക്കാരൻ ഉയർത്തിയതെന്നു ചൂണ്ടിക്കാട്ടിയാണ് ലോകായുക്ത ജസ്റ്റിസ് സിറിയക് ജോസഫും ഉപലോകായുക്ത ജസ്റ്റിസ് ഹാറൂൺ അൽ റഷീദും അടങ്ങിയ രണ്ടംഗ ബെഞ്ച് ഹർജി തള്ളിയത്. ദുരിതാശ്വാസ നിധി ദുരുപയോഗം സംബന്ധിച്ച ഹർജി പരിഗണിക്കണോ എന്ന കാര്യത്തിൽ ലോകായുക്ത ഫുൾ ബെഞ്ച് നേരത്തെ തീരുമാനമെടുത്തതാണെന്നും ഈ കാര്യം അവഗണിച്ചാണ് ഹർജി നിലനിൽക്കുന്നതാണോ എന്ന് പരിശോധിക്കാൻ വീണ്ടും ഫുൾബെഞ്ചിനു വിട്ടുകൊണ്ടുള്ള വിധി വന്നത് എന്നുമാണ് ആർഎസ് ശശികുമാർ വാദിച്ചത്.
