അബുദാബി അന്താരാഷ്ട്ര വിമാനത്താവളത്തിലൂടെ പോകുന്ന യാത്രക്കാര്‍ക്കായി ലുലു ഹൈപ്പര്‍മാര്‍ക്കറ്റിൽ സിറ്റി ചെക്ക് ഇന്‍ സൗകര്യം ഏർപ്പെടുത്തി. അല്‍ ഐന്‍ കുവൈത്താത്തിലെ ലുലു ഹൈപ്പര്‍മാര്‍ക്കറ്റ് മാളിലാണ് സിറ്റി ചെക്ക് ഇന്‍ സൗകര്യം ഏർപ്പെടുത്തിയത്.മുറാഫിക് ഏവിയേഷന്‍ സര്‍വിസിന്‍റെ കീഴിലാണ് സേവനം ആരംഭിച്ചത്.
യാത്രക്കാര്‍ക്ക് വിമാനത്താവളത്തിലെത്തി നീണ്ട ക്യൂവില്‍ കാത്തുനില്‍ക്കാതെ നേരിട്ട് എമിഗ്രേഷന്‍ വിഭാഗത്തിലേക്ക് പോകാൻ ഇതോടെ സൌകര്യം ഒരുങ്ങും. യാത്ര പുറപ്പെടുന്നതിന്‍റെ ഏഴു മണിക്കൂര്‍ മുതല്‍ 24 മണിക്കൂര്‍ മുമ്പുവരെ ഈ കേന്ദ്രത്തില്‍ ബാഗേജ് സ്വീകരിച്ച് ബോര്‍ഡിങ് കാര്‍ഡ് നല്‍കുമെന്ന് അധികൃതർ അറിയിച്ചു. മുതിര്‍ന്നവര്‍ക്ക് 35 ദിര്‍ഹവും കുട്ടികള്‍ക്ക് 25 ദിര്‍ഹവുമാണ് നിരക്ക് ഈടാക്കുക.
രാവിലെ 10 മുതല്‍ രാത്രി 10 വരെ സിറ്റി ചെക്ക് ഇന്‍ സൗകര്യം പ്രയോജനപ്പെടുത്താം. ഇത്തിഹാദ് എയര്‍വേസ്, എയര്‍ അറേബ്യ, വിസ് എയര്‍, ഈജിപ്ത് എയര്‍ എന്നീ വിമാനങ്ങളില്‍ യാത്ര ചെയ്യുന്നവര്‍ക്കാണ് ആദ്യഘട്ടത്തിൽ സിറ്റി ചെക്ക് ഇന്‍ സൗകര്യം ലഭ്യമാവുകയെന്നും അധികൃതർ സൂചിപ്പിച്ചു.
