ഇന്ത്യയിൽ പുതിയൊരു വാലറ്റ് ആപ്ലിക്കേഷൻ അവതരിപ്പിച്ച് ഗൂഗിൾ. ഡിജിറ്റൽ വാലറ്റ് ആപ്ലിക്കേഷനായ ഗൂഗിൾ വാലറ്റ് ആണ് ഇന്ത്യയിൽ അവതരിപ്പിച്ചിരിക്കുന്നത്. പണമിടപാടല്ലാത്ത ഡിജിറ്റൽ ആവശ്യങ്ങൾക്കായാണ് ഈ ആപ്പ് ഉപയോഗിക്കുക. ഡിജിറ്റൽ വിവരങ്ങൾ സൂക്ഷിക്കുന്നതിന് വേണ്ടിയുള്ള ഈ ആപ്പിൽ ഡിജിറ്റൽ കാർ കീ, മൂവി ടിക്കറ്റുകൾ, യാത്രാ പാസുകൾ, ഗിഫ്റ്റ് കാർഡുകൾ എന്നിവയെല്ലാം ഡിജിറ്റലായി സൂക്ഷിക്കാൻ സാധിക്കും.
ഗൂഗിൾപേ സ്വീകരിക്കുന്ന ഇടങ്ങളിൽ വേഗത്തിൽ പണമടയ്ക്കുന്നതിനായി ഡെബിറ്റ് അല്ലെങ്കിൽ ക്രെഡിറ്റ് കാർഡുകൾ ഗൂഗിൾ വാലറ്റിൽ ശേഖരിക്കാനാകും. യഥാർത്ഥ കാർഡ് നമ്പർ ഒരിക്കലും പണമടയ്ക്കുന്നവരുമായി പങ്കിടില്ലെന്നതാണ് പ്രത്യേകത. ലോഗിൻ സുരക്ഷയ്ക്ക് വേണ്ടി രണ്ട് ഘട്ട പരിശോധനയും ഇതിൽ ഉൾപ്പെടുത്തിയിട്ടുണ്ട്. ഫോൺ നഷ്‌ടപ്പെടുകയോ മോഷ്ടിക്കപ്പെടുകയോ ചെയ്താൽ നിങ്ങളുടെ വിവരങ്ങൾ എടുത്തുമാറ്റാൻ റിമോട്ട് ഡാറ്റ ഇറേസ്, കാർഡ് വിശദാംശങ്ങൾ പരിരക്ഷിക്കുന്നതിന് പേമെൻ്റ് കോഡുകളുടെ എൻക്രിപ്ഷൻ എന്നിവയും ഉണ്ട്.
രാജ്യത്തെ ആൻഡ്രോയിഡ് ഉപഭോക്താക്കൾക്കാണ് വാലറ്റ് ആപ്പ് ലഭ്യമാവുക. ഗൂഗിൾ പ്ലേ സ്റ്റോറിൽ ലഭ്യമായിരിക്കുന്ന ഈ ആപ്പ് വിയർ ഒ.എസ്, ഫിറ്റ്ബിറ്റ് ഒ.എസ് എന്നിവയിലും ലഭ്യമാണ്. അതേസമയം ഐഫോണിൽ ഇത് ലഭ്യമല്ലെന്നാണ് റിപ്പോർട്ട്. 80 രാജ്യങ്ങളിലാണ് നിലവിൽ വാലറ്റ് ആപ്പ് ഉപയോഗിക്കുന്നത്. അതേസമയം എയർ ഇന്ത്യ, ഇൻഡിഗോ, ബി.എം.ഡബ്ല്യു, ഫ്ലിപ്‌കാർട്ട്, കൊച്ചി മെട്രോ, പി.വി.ആർ, ഇനോക്സ് തുടങ്ങിയ സ്ഥാപനങ്ങൾ വാലറ്റിനുവേണ്ടി ഗൂഗിളുമായി സഹകരിക്കുന്നുണ്ടെന്നാണ് റിപ്പോർട്ട്.
