ജോർദാനിൽ തെക്കൻ തുറമുഖ നഗരമായ അക്കാബയിൽ വിഷവാതക ചോർച്ച. വിഷവാതകം ശ്വസിച്ച്‌ പത്ത് പേർ മരിച്ചു. 250 പേർക്ക് പരിക്കേറ്റതായും അധികൃതർ അറിയിച്ചു. ഗ്യാസ് ടാങ്ക് കൊണ്ടുപോകുന്നതിനിടെയാണ് ചോർച്ചയുണ്ടായതെന്ന് ഔദ്യോഗിക ജോർദാൻ ടിവിയുടെ റിപ്പോർട്ട്.
ടാങ്കറിൽ എന്തൊക്കെ വസ്തുക്കളാണ് സൂക്ഷിച്ചിരിക്കുന്നതിനെ കുറിച്ച് വ്യക്തതയില്ല. പരിക്കേറ്റവരെ ആശുപത്രികളിലേക്ക് മാറ്റിയതിന് ശേഷം പ്രദേശം സീൽ ചെയ്തതായി പബ്ലിക് സെക്യൂരിറ്റി ഡയറക്ടറേറ്റ് അറിയിച്ചു. 199 പേർ പരിക്കേറ്റ് ഇപ്പോഴും ആശുപത്രികളിൽ ചികിത്സയിലാണെന്ന് സർക്കാർ ടിവി ചാനലായ അൽ-മമാൽക്ക റിപ്പോർട്ട് ചെയ്യുന്നു.
വാതക ചോർച്ചയുണ്ടായ സ്ഥലത്തുനിന്നും 25 കിലോമീറ്റർ അകലെയുള്ള ജനവാസ മേഖലകളിൽ ഉള്ളവരോട് വീടുകളിൽ തന്നെ കഴിയാനും ജനലുകളും വാതിലുകളും അടച്ചിടാനും ഭരണകൂടം ആവശ്യപ്പെട്ടിട്ടുണ്ട്. വാതക ചോർച്ചയെ തുടർന്ന് സമീപ പ്രദേശങ്ങളിൽ അപകട സാധ്യതയും വർധിച്ചിട്ടുണ്ട്. ചോർച്ചയെക്കുറിച്ച് അന്വേഷിക്കാൻ വിദഗ്ധ സംഘത്തെ അയച്ചതായും റിപ്പോർട്ടുകൾ.
