തുർക്കി-സിറിയ ഭൂചലനത്തിൽ മരണം 15,000 കടന്നു. തുടര്‍ ചലനങ്ങളും കനത്ത മഴയും മഞ്ഞു വീഴ്ചയും കാരണം കാലാവസ്ഥ ഇപ്പോഴും വെല്ലുവിളിയാണ്. ഗുരുതരമായി പരിക്കേറ്റ ആയിരക്കണക്കിന് ആളുകള്‍ ചികിത്സ കിട്ടാതെ ദുരിതത്തിലാണെന്ന് ലോകാരോഗ്യ സംഘടന അറിയിച്ചു.
62 മണിക്കൂറിലേറെയായി കോണ്‍ക്രീറ്റ് കട്ടകള്‍ക്കിടയില്‍ പലരും കുടുങ്ങിക്കിടക്കുകയാണ്. കെട്ടിടങ്ങൾ വമ്പൻ ശബ്ദത്തോടെ നിലംപതിച്ചപ്പോൾ അതിനിടയിൽ കുടുങ്ങിയത് പതിനായിരത്തിലേറെ ജനങ്ങളാണ്.
പ്രതികൂല കാലാവസ്ഥ കാരണം വൈദ്യസഹായം, വെള്ളം, ഭക്ഷണം എന്നിവ ദുരന്തമേഖലയില്‍ എത്തിക്കാനുള്ള വഴിയടയുകയാണ്. കെട്ടിടാവശിഷ്ടങ്ങള്‍ക്കിടിയില്‍ കിടന്ന് സഹായിക്കാൻ നിലവിളികള്‍ കേൾക്കുന്നുണ്ടെങ്കിലും രക്ഷാ ഉപകരണങ്ങൾ കുറവാണ്.
മൃതദേഹങ്ങള്‍ സൂക്ഷിക്കാൻ ബാഗുകളുടെ ദൗര്‍ലഭ്യമുണ്ട്. ഇസ്താംബുൾ സ്റ്റോക്ക് എക്സ്ചേഞ്ച് താൽക്കാലികമായി നിർത്തിവച്ചു. രക്ഷാപ്രവര്‍ത്തനം വൈകിയതായുള്ള കനത്ത വിമര്‍ശനങ്ങള്‍ക്കിടെ തുർക്കി പ്രസിഡൻ്റ് രജബ് ത്വയ്യിബ് എർദോഗൻ ദുരന്തമേഖലകള്‍ സന്ദർശിച്ചു.ദുരന്ത വ്യാപ്തി അളക്കാൻ കഴിഞ്ഞിട്ടില്ലെന്ന് എർദോഗൻ പറഞ്ഞു.
രക്ഷാപ്രവർത്തനങ്ങളിൽ ഇന്ത്യയുടെ സഹായം തുടരുന്നുണ്ട്. ഓപ്പറേഷൻ ദോസ്തിൻ്റെ ഭാഗമായി വ്യോമസേനയുടെ 7 വിമാനങ്ങൾ ദുരന്തബാധിത മേഖലകളിലുണ്ടാകും. 150ലധികം രക്ഷാപ്രവർത്തകരും 100ലധികം ആരോഗ്യ പ്രവർത്തകരും ദുരിതാശ്വാസ പ്രവർത്തനങ്ങളിൽ സജീവമാണ്. തുർക്കി ആവശ്യപ്പെടുന്നതനുസരിച്ച് കൂടുതൽ സംഘത്തെ അയക്കാൻ തയ്യാറാണെന്ന് വിദേശകാര്യമന്ത്രാലയം വ്യക്തമാക്കിയിരുന്നു. ദുരന്തബാധിത മേഖലയിൽ കുടുങ്ങിയ 10 ഇന്ത്യക്കാർ സുരക്ഷിതരാണ്. കാണാതായ ബംഗളൂരു സ്വദേശിയുടെ കുടുംബവുമായി വിദേശകാര്യമന്ത്രാലയം നിരന്തരം ബന്ധപ്പെടുന്നുണ്ട്.
