പശു പുല്ല് തിന്നും, പാല് തരും എന്നൊക്കെയാണല്ലോ ഇതുവരെ പറഞ്ഞു ശീലിച്ചത്. എന്നാൽ ഇത്തരം വാക്കുകളൊക്കെ മാറ്റിപിടിക്കേണ്ട കാലമെത്തി. ഈ പശു പുല്ലു തിന്നില്ല, ഇഷ്ടം പഴങ്ങളും പച്ചക്കറിയും ബേക്കറി സാധനങ്ങളും മാത്രം.
പഴങ്ങളെക്കാളും പച്ചക്കറിയെക്കാളും ഏറെ ഇഷ്ടം ബേക്കറി സാധനങ്ങളാണെന്ന് മാത്രം. ബേക്കറി ഐറ്റത്തിലോ ഹൽവയും. വടകര കണ്ണൂക്കര ചള്ളയിൽ രവീന്ദ്രന്റെ വീട്ടിലെ സുപ്രഭ എന്ന പശുവാണ് ഈ ഹൽവ പ്രേമി. സുപ്രഭയ്ക്ക് 37 വയസ്സുണ്ട്.
സാധാരണ പശുവിന്റെ ആയുസ്സ് 21 –22 വർഷമാണ്. സുപ്രഭ 15 കിടാങ്ങളെ പെറ്റു. 7 ലീറ്റർ വരെ പാലും ചുരത്തി നൽകിയിരുന്നു. അവസാനത്തെ പൈക്കിടാവിനെ പെറ്റ ശേഷം 2 തവണ കുത്തിവയ്പ് നടത്തിയിട്ടും പിന്നീട് പ്രസവം നടന്നില്ല. അതിൽ പിന്നെയാണ് പുല്ലും കാലിത്തീറ്റയും കഴിക്കാതായത്. മധുരം സുപ്രഭയ്ക്ക് നിർബന്ധമാണെന്നും ഒന്നും കിട്ടിയില്ലെങ്കിൽ ശർക്കരയെങ്കിലും വാങ്ങിക്കൊടുക്കണമെന്നും രവീന്ദ്രൻ പറയുന്നു. എയ്ഡ്സ് കൺട്രോൾ സൊസൈറ്റിയിലെ താൽക്കാലിക ജീവനക്കാരനാണ് രവീന്ദ്രൻ.
