ലോകകപ്പ് ക്രിക്കറ്റ് സന്നാഹ മത്സരത്തിന് മുന്നോടിയായി തുമ്പയിൽ പരിശീലനം ആരംഭിച്ച് ഇന്ത്യൻ ടീം. ഇന്നലെയാണ് ഇന്ത്യൻ ടീം അംഗങ്ങൾ തലസ്ഥാനത്ത് എത്തിയത്. സംഘത്തോടൊപ്പം എത്താതിരുന്ന വിരാട് കോലി സന്നാഹ മത്സരത്തിന് മുൻപ് ടീമിനൊപ്പം ചേരും. നാളെ ഉച്ചകഴിഞ്ഞ് 2 മണിക്കാണ് നെതർലന്റ്സിനെതിരായ ഇന്ത്യയുടെ മത്സരം ആരംഭിക്കുക.
ഇന്ന് ഉച്ചകഴിഞ്ഞ് 2 മണി മുതൽ തുമ്പ സെന്റ് സേവ്യേഴ്സ് കോളേജ് ഗ്രൗണ്ടിൽ ആരംഭിച്ച പരിശീലനം വൈകിട്ട് 5 വരെ നീണ്ടുനിൽക്കും. ഗുവാഹാത്തിയിൽ ഇംഗ്ലണ്ടിനെതിരായ സന്നാഹ മത്സരം മഴ മൂലം ഉപേക്ഷിച്ചിരുന്നു. നാളത്തെ ഇന്ത്യ-നെതർലന്റ്സ് മത്സരത്തിനും മഴ ഭീഷണി നിലനിൽക്കുന്നുണ്ട്. മത്സരത്തിനായി നെതർലന്റ്സ് ടീം ഇന്നലെ പരിശീലനം നടത്തിയിരുന്നു. ലോകകപ്പ് മത്സരങ്ങൾക്ക് മുൻപുള്ള അവസാന സന്നാഹ മത്സരത്തിൽ ബാറ്റിങ്ങിലും ബോളിങ്ങിലും ഫീൽഡിങ്ങിലും മികച്ച പ്രകടനം പുറത്തെടുക്കാനാണ് ഇന്ത്യൻ ടീം ശ്രമിക്കുക.
