വനിതാ ഫുട്‌ബോള്‍ ലോകകപ്പിൽ യു.എസിന്റെയും ഓസ്ട്രേലിയയുടെയും കണക്കുകൂട്ടലുകൾ പിഴച്ചപ്പോൾ പോർച്ചുഗലിനും നൈജീരിയക്കും ആശ്വാസജയം. വനിതാ ഫുട്ബോൾ ലോകകപ്പിന്റെ ഗ്രൂപ്പുഘട്ടത്തിലെ രണ്ടാം മത്സരമാണ് ആരാധകരെ ആവേശത്തിലെത്തിച്ചത്. മത്സരത്തിൽ വമ്പൻടീമുകൾക്ക് വലിയ തിരിച്ചടിയാണ് നേരിടേണ്ടിവന്നത്. നെതർലൻഡുമായി സമനില പങ്കിട്ട യു.എസിന് (1-1) പ്രീക്വാർട്ടറിലെത്താൻ അടുത്ത മത്സരംവരെ കാത്തിരിക്കണം. കൂടാതെ മത്സരത്തിന് ആതിഥേയരായ ഓസ്ട്രേലിയ നൈജീരിയയോട് തോറ്റത് 3-2നാണ്. വിയറ്റ്നാമിനെ എതിരില്ലാത്ത രണ്ടുഗോളിന് തോൽപ്പിച്ച് പോർച്ചുഗൽ പ്രീക്വാർട്ടറിലെത്തുകയും ചെയ്തു.
പ്രീക്വാർട്ടർ മുന്നിൽക്കണ്ടാണ് നെതർലൻഡ്സ് യു.എസിനെതിരേ പോരിനിറങ്ങിയത്. 17-ാം മിനിറ്റിൽ ജിൽ റൂഡ് ഗോളടിച്ച് ഡച്ചുകാർക്ക് പരിഗണന നൽകി. ക്യാപ്റ്റൻ ലിൻഡ്സി ഹൊറന്റെ (62) ഗോളിൽ യു.എസ്. കളിയിലേക്ക് തിരിച്ചെത്തി. പിന്നീട് ഇരുവർക്കും ഗോളെടുക്കാനായില്ല. രണ്ടുകളിയിൽ ഓരോ ജയവും സമനിലയുമായി ഇരുടീമുകൾക്കും നാലുപോയന്റുവീതമാണ്. അടുത്തകളിയിൽ വിയറ്റ്നാമിനെ തോൽപ്പിച്ചാൽ നെതർലൻഡ്സിന് പ്രീക്വാർട്ടർ ഉറപ്പാക്കാം.
വിയറ്റ്നാമിനെതിരേ പോർച്ചുഗലിനുവേണ്ടി ടെൽമ എൻകർനാച്ചോ (ഏഴ്), ഫ്രാൻസിസ്ക നസറത്ത് (21) എന്നിവർ ഗോളടിച്ചു. ആദ്യമത്സരത്തിൽ നെതർലൻഡ്സിനോട് തോറ്റ പോർച്ചുഗലിന് രണ്ടാംകളി വളരെ നിർണായകമായിരുന്നു. ഇതിൽ ജയിച്ചതോടെ പ്രീക്വാർട്ടറിലേക്കുള്ള വഴി ഇവർക്ക് എളുപ്പമാകും. യു.എസിനെതിരായ അടുത്ത മത്സരം ജയിച്ചാൽ അവസാന 16-ലെത്താനും സാധിക്കും. രണ്ടുകളിയും തോറ്റ വിയറ്റ്നാം ലോകകപ്പിൽനിന്ന് പുറത്തായി. തുടർച്ചയായ രണ്ടാംജയത്തോടെ പ്രീക്വാർട്ടർ മോഹിച്ചെത്തിയ ഓസ്ട്രേലിയയെ നൈജീരിയ തോൽപ്പിച്ചു. ഓസ്ട്രേലിയയുടെ പ്രതിരോധത്തിന് വിള്ളലുണ്ടാക്കിയാണ് നൈജീരിയ ഗോളടിച്ചുകൂട്ടിയത്. അടുത്തകളിയിൽ കാനഡയെ തോൽപ്പിക്കാൻ സാധിച്ചാൽ ആതിഥേയരായ ഓസ്ട്രേലിയക്ക് പ്രീക്വാർട്ടറിലെത്താം.
