വനിതാ ടി20 ലോകകപ്പ് മൽസരങ്ങൾക്ക് ഇന്ന് കൊടിയേറും. ഷാർജയിലും, ദുബായിലുമായാണ് ഇത്തവണ മത്സരങ്ങൾ നടത്തപ്പെടുന്നത്. യുഎഇ സമയം ഉച്ചക്ക് രണ്ട് മണിക്ക് ഷാർജയിൽ നടക്കുന്ന ഉദ്ഘാടന മൽസരത്തിൽ ബംഗ്ലാദേശ് അയർലന്റിനെ നേരിടും.
ഇന്ന് വൈകുന്നേരം ആറ് മണിക്ക് ദുബായിൽ നടത്തുന്ന മത്സരത്തിൽ പാക്കിസ്ഥാൻ ശ്രീലങ്കയുമായി ഏറ്റുമുട്ടും. നാളെ വൈകിട്ട് ദുബായിൽ ന്യൂസിലന്റനെതിരെയാണ് ഇന്ത്യയുടെ ആദ്യ മൽസരം നടക്കുക. ഒക്ടോബർ ആറിന് ഉച്ചക്ക് രണ്ടിനായിരിക്കും ഇന്ത്യയും പാക്കിസ്ഥാനും തമ്മിലുള്ള പോരാട്ടം നടക്കുക. ഇന്ത്യയുടെ എല്ലാ മത്സരങ്ങളും ദുബായ് ക്രിക്കറ്റ് സ്റ്റേഡിയത്തിലാണ് നടക്കുക.
ക്യാപ്റ്റൻ ഹർമൻപ്രീത് കൗറിന്റെ നേതൃത്വത്തിലാണ് ഇന്ത്യൻ ടീം ലോകകപ്പിൽ പോരാടാനിറങ്ങുന്നത്. വയനാട് മാനന്തവാടി സ്വദേശി സജ്‌ന സജീവൻ, തിരുവനന്തപുരം പേരൂർക്കട സ്വദേശി ആശാ ശോഭന എന്നീ മലയാളികൾ കൂടി ഇത്തവണ ഇന്ത്യൻ ടീമിൽ ഉൾപ്പെട്ടിട്ടുണ്ട്.
