ക്രിക്കറ്റ് ഇതിഹാസം മഹേന്ദ്രസിങ് ധോണിയുടെ ഏഴാം നമ്പർ ജേഴ്സിയെക്കുറിച്ച് സംസാരിക്കാത്ത ആരാധകർ ചുരുക്കമാണ്. ഇന്ത്യൻ ടീമിലെത്തിയപ്പോൾ ധോണിക്ക് ഏത് നമ്പർ തിരഞ്ഞെടുക്കണമെന്ന് രണ്ടാമതൊന്ന് ആലോചിക്കേണ്ടി വന്നില്ല. കാരണം ഒരു നമ്പർ മാത്രമായിരുന്നു താരത്തിന്റെ മനസിൽ. ധോണിയും ഏഴ് എന്ന നമ്പറും തമ്മിലുള്ള ആത്മബന്ധം എന്താണെന്നറിയാമോ. ധോണിയുടെ ഭാഗ്യനമ്പർ ആയതിനാലാണ് താരം ഈ ജേഴ്സി തിരഞ്ഞെടുത്തത് എന്നൊക്കെയാണ് ആരാധകർ വിശേഷിപ്പിക്കുന്നത്. എന്നാൽ അതല്ല വാസ്തവം. അതിന് പിന്നിലൊരു കഥയുണ്ട്.
ഒരു അഭിമുഖത്തിനിടെ താരം തന്നെയാണ് തന്റെ ജേഴ്സിയുടെ പിന്നിലുള്ള കഥ വെളിപ്പെടുത്തിയത്. ഞാൻ ഭൂമിയിൽ വരണം എന്ന് എൻ്റെ മാതാപിതാക്കൾ തീരുമാനമെടുത്ത സമയമാണതെന്നായിരുന്നു ധോണി വെളിപ്പെടുത്തിയത്. “ജൂലെ ഏഴിനാണ് ഞാൻ ജനിച്ചത്. ജൂലൈ ഏഴാം മാസമാണല്ലോ. 1981 ആണ് എന്റെ ജനനവർഷം. എട്ടിൽ നിന്ന് ഒന്ന് കുറച്ചാലും ഏഴാണല്ലോ. ഇതൊക്കെ കാരണമാണ് ഞാൻ ഏഴാം നമ്പർ തെരഞ്ഞെടുത്തത്” എന്നാണ് താരം പറഞ്ഞത്.
ഇന്ത്യയ്ക്ക് രണ്ടാം ലോകകപ്പ് കിരീടം സമ്മാനിച്ചതുൾപ്പെടെയുള്ള താരത്തിന്റെ സംഭാവനകൾ കണക്കിലെടുത്ത് ആദരസൂചകമായി ധോണിയുടെ ഏഴാം നമ്പർ ജേഴ്സി ബിസിസിഐ പിൻവലിച്ചിരുന്നു. അതിനാൽ മറ്റൊരു താരത്തിനും ഇനി ഏഴാം നമ്പർ ലഭിക്കില്ല. അത് എന്നും ക്രിക്കറ്റ് ഇതിഹാസം എം.എസ് ധോണിക്ക് മാത്രം സ്വന്തമായിരിക്കും.
