ഇന്ത്യയിൽ നടക്കുന്ന ഏകദിന ക്രിക്കറ്റ് ലോകകപ്പിന്റെ രണ്ടാം ഘട്ട ടിക്കറ്റ് വില്പന നാളെ (സെപ്റ്റംബർ 8) ആരംഭിക്കുമെന്ന് ബിസിസിഐ. രാത്രി എട്ട് മണിക്കാണ് ടിക്കറ്റ് വിൽപ്പന ആരംഭിക്കുക. ഔദ്യോഗിക വെബ്സൈറ്റായ https://tickets.cricketworldcup.com വഴി ഓൺലൈനായാണ് ടിക്കറ്റുകൾ ബുക്ക് ചെയ്യേണ്ടത്. ടിക്കറ്റുകൾ അതിവേഗം വിറ്റുപോകുന്നതിനാൽ ലോകകപ്പിനായി ഏകദേശം നാലുലക്ഷം ടിക്കറ്റുകൾ കൂടി പുറത്തിറക്കുമെന്ന് ബിസിസിഐ അറിയിച്ചു.
ആദ്യ ഘട്ടത്തിൽ ഇന്ത്യ ഒഴികെയുള്ള ടീമുകളുടെ സന്നാഹ മത്സരങ്ങളുടെയും ലോകകപ്പ് മത്സരങ്ങളുടെയും ടിക്കറ്റ് വിൽപ്പന ഓഗസ്റ്റ് 28-ന് ആരംഭിച്ചിരുന്നു. സെപ്റ്റംബർ മൂന്നിന് വിൽപ്പനയ്ക്കുവെച്ച ഇന്ത്യ – പാകിസ്താൻ മത്സരത്തിന്റെ ടിക്കറ്റുകൾ അതിവേഗത്തിയായിരുന്നു വിറ്റുപോയത്. സെമിഫൈനൽ, ഫൈനൽ മത്സരങ്ങളുടെ ടിക്കറ്റ് വിൽപ്പന സെപ്റ്റംബർ 15-ന് ആരംഭിക്കുമെന്നും ബിസിസിഐ അറിയിച്ചു.
