കേപ്ടൗണിലെ വിജയത്തിന് പിന്നാലെ ലോക ടെസ്റ്റ് ചാമ്പ്യന്‍ഷിപ്പിൽ ഒന്നാം സ്ഥാനം തിരികെപ്പിടിച്ച് ടീം ഇന്ത്യ. ദക്ഷിണാഫ്രിക്കയ്ക്കെതിരെ നടന്ന ടെസ്റ്റ് പരമ്പരയിലെ രണ്ടാം മത്സരത്തിൽ വിജയിച്ചതോടെയാണ് ലോക ടെസ്റ്റ് ചാമ്പ്യൻഷിപ്പിൽ ഇന്ത്യ ഒന്നാം സ്ഥാനം തിരികെ നേടിയത്. ലോക ടെസ്റ്റ് ചാമ്പ്യൻഷിപ്പ് 2023-25 പോയന്റ് ടേബിളിൽ രോഹിത് ശർമയുടെ നേതൃത്വത്തിലുള്ള ഇന്ത്യൻ ടീം 54.16 പോയന്റ് ശതമാനത്തോടെയാണ് ഒന്നാം സ്ഥാനത്തെത്തിയത്.
സെഞ്ചൂറിയനിൽ നടന്ന ടെസ്റ്റിൽ ദക്ഷിണാഫ്രിക്കയോട് പരാജയപ്പെട്ടതിനെത്തുടർന്ന് ഇന്ത്യ ആറാം സ്ഥാനത്തേക്ക് പിൻതള്ളപ്പെട്ടിരുന്നു. എന്നാൽ ദക്ഷിണാഫ്രിക്കയ്ക്കെതിരെ നടന്ന രണ്ടാം ടെസ്റ്റിലെ ജയത്തോടെ നീലപ്പട ഒന്നാം സ്ഥാനം തിരികെപ്പിടിച്ചിരിക്കുകയാണ്. പരമ്പരയിലെ ആദ്യ ടെസ്റ്റ് ജയിച്ച് പോയന്റ് ടേബിളിൽ ഒന്നാമതെത്തിയ ദക്ഷിണാഫ്രിക്ക ഇതോടെ രണ്ടാം സ്ഥാനത്തുമായി.
നിലവിൽ 50 ആണ് ദക്ഷിണാഫ്രിക്കയുടെ പോയൻ്റ് ശതമാനം. എന്നാൽ സിഡ്‌നിയിൽ നടന്നുകൊണ്ടിരിക്കുന്ന ഓസ്ട്രേലിയ – പാക്കിസ്ഥാൻ ടെസ്റ്റ് കഴിയുമ്പോൾ ഈ പോയിന്റ് ടേബിളിൽ മാറ്റം വരും.
