ടി20 ലോകകപ്പിൽ സെമി ഫൈനലിൽ സീറ്റുറപ്പിച്ച് ദക്ഷിണാഫ്രിക്ക. സൂപ്പർ എട്ടിലെ അവസാന മത്സരത്തിൽ ആതിഥേയരായ വെസ്റ്റിൻഡീസിനെ മൂന്ന് വിക്കറ്റിന് പരാജയപ്പെടുത്തിയാണ് ദക്ഷിണാഫ്രിക്ക സെമിയിലേയ്ക്ക് ടിക്കറ്റെടുത്തത്. ഗംഭീര പ്രകടനത്തിലൂടെ സൂപ്പർ 8-ലെ മൂന്നാം വിജയമാണ് പ്രോട്ടീസ് ഇതോടെ സ്വന്തമാക്കിയത്.
രണ്ടാം ഗ്രൂപ്പിൽ ഒന്നാം സ്ഥാനക്കാരായാണ് ദക്ഷിണാഫ്രിക്ക സെമി സീറ്റ് ഉറപ്പിച്ചത്. ഗ്രൂപ്പിൽ മൂന്ന് മത്സരങ്ങളിൽ നിന്നായി ആറ് പോയന്റാണ് ദക്ഷിണാഫ്രിക്ക നേടിയത്. പട്ടികയിൽ രണ്ടാമതുള്ള ഇംഗ്ലണ്ട് നേരത്തേ സെമിയിലെത്തിയിരുന്നു. ടി20 ലോകകപ്പിൽ സെമിയിലെത്തുന്ന ആദ്യ ടീമായിരുന്നു ഇംഗ്ലണ്ട്. മൂന്ന് മത്സരങ്ങളിൽ നിന്ന് 4 പോയന്റാണ് ഇംഗ്ലണ്ടിനുള്ളത്. രണ്ട് പോയന്റുള്ള വെസ്റ്റിൻഡീസ് മൂന്നാം സ്ഥാനത്തായിരുന്നു. ജയിച്ചാൽ സെമിയിലേക്ക് മുന്നേറാമായിരുന്നെങ്കിലും പരാജയപ്പെട്ടതോടെ ടീം പുറത്താകുകയും ചെയ്തു.
വിൻഡീസ് നിശ്ചിത 20-ഓവറിൽ എട്ട് വിക്കറ്റ് നഷ്ടത്തിൽ 135-റൺസാണെടുത്തത്. മഴ മൂലം 17-ഓവറിൽ 123-റൺസായിരുന്നു പ്രോട്ടീസിൻ്റെ ലക്ഷ്യം. തുടർന്ന് നടന്ന കടുത്ത പോരാട്ടത്തിനൊടുവിൽ ഏഴ് വിക്കറ്റ് നഷ്ടത്തിൽ അഞ്ച് പന്തുകൾ ബാക്കി നിൽക്കെ ദക്ഷിണാഫ്രിക്ക ലക്ഷ്യത്തിലെത്തുകയും ചെയ്തു. അതോടെ വിൻഡീസ് സെമി കാണാതെ പുറത്തായി.
