ഐപിഎല്ലിന്റെ പുതിയ സീസൺ ആരംഭിച്ചത് മുതൽ വാർത്തകളിൽ നിറയുകയാണ് രോഹിത് ശർമ. മുംബൈ ഇന്ത്യൻസിന്റെ മുൻ ക്യാപ്റ്റനായ രാഹിത്തിനെ മാറ്റി പകരം ഹാർദിക് പാണ്ഡയെ നായകനാക്കിയതോടെ ക്രിക്കറ്റ് ആരാധകർ ഒന്നടങ്കം പ്രതിഷേധ ശബ്ദം ഉയർത്തിയിരുന്നു. ഇപ്പോൾ രോഹിത്തുമായി ബന്ധപ്പെട്ട് ഉയരുന്ന ചില റിപ്പോർട്ടുകളാണ് വീണ്ടും ആരാധകരെ ആശങ്കപ്പെടുത്തുന്നത്. രോഹിത് ശർമ അടുത്ത വർഷം നടക്കുന്ന മെഗാ ഐപിഎൽ ലേലത്തിൽ പങ്കെടുക്കുമെന്നാണ് റിപ്പോർട്ട്.
ഇതോടെ രോഹിത് ശർമ മുംബൈ ഇന്ത്യൻസ് വിടുമോയെന്നാണ് ആരാധകർ ചോദിക്കുന്നത്. ഈ സീസണിൽ ഹാർദിക് പാണ്ഡ്യയെ മുംബൈ ക്യാപ്റ്റനാക്കിയതിനു പിന്നാലെ രോഹിത് ടീം വിടുമെന്ന് അഭ്യൂഹങ്ങളുണ്ടായിരുന്നു. എന്നാൽ രോഹിത്തോ മുംബൈ ടീം അധികൃതരോ ഈ വിഷയത്തിൽ പ്രതികരിച്ചിരുന്നില്ല. പിന്നാലെ സീസണിലെ മൂന്ന് മത്സരങ്ങളിലും ഹാർദിക്കിന്റെ നേതൃത്വത്തിലുള്ള മുംബൈ പരാജയപ്പെട്ടതോടെ ആരാധകർ ഒന്നടങ്കം ഹാർദ്ദിക്കിനെതിരെ തിരിയുകയും രോഹിത്തിനെ ക്യാപ്റ്റനാക്കണമെന്ന് ആവശ്യപ്പെടുകയും ചെയ്തിരുന്നു.
ക്യാപ്റ്റൻസി വിവാദത്തോടെ ഹാർദിക് പാണ്ഡ്യയ്ക്കെതിരെ ക്രിക്കറ്റ് ആരാധകർ വലിയ പ്രതിഷേധങ്ങൾ ഉയർത്തിയിരുന്നു. എല്ലാ മത്സരങ്ങളിലും ഗ്യാലറിയിലിരുന്ന് കാണികൾ ഹാർദിക്കിനെ കൂകി വിളിക്കുകയും കളിയാക്കുകയും ചെയ്തിരുന്നു. ഒരു ഘട്ടത്തിൽ ഹാർദിക്കിനെ കളിയാക്കരുതെന്ന് രോഹിത് ശർമ ആരാധകരോട് ആവശ്യപ്പെടുകയും ചെയ്തു. ടീമിന്റെ ക്യാപ്റ്റൻ സ്ഥാനത്തുനിന്ന് രോഹിത്തിനെ മാറ്റി ഹർദിക്കിനെ ചുമതലപ്പെടുത്തിയത് ഇപ്പോഴും ആരാധകർക്ക് ഉൾക്കൊള്ളാനും സാധിച്ചിട്ടില്ല. ഇതിനിടെയാണ് രോഹിത് ലേലത്തിൽ പങ്കെടുക്കുമെന്ന റിപ്പോർട്ടുകൾ ഉയരുന്നത്.
