ഇന്ത്യയിലെ ഒന്നാം നമ്പർ ചെസ് താരമായി ആർ. പ്രഗ്നാനന്ദ. അഞ്ച് തവണ ലോക ചാമ്പ്യനായ വിശ്വനാഥൻ ആനന്ദിനെ ഫിഡെ റേറ്റിങ്ങിൽ മറികടന്നായിരുന്നു പ്രഗ്നാനന്ദയുടെ കുതിപ്പ്. ടാറ്റ സ്‌റ്റീൽ ചെസ് ചാമ്പ്യൻഷിപ്പിൽ ലോക ചാമ്പ്യൻ ഡിങ് ലിറനെ തോൽപിച്ചതോടെയാണ് ഇന്ത്യൻ താരം റേറ്റിങ്ങിൽ മുന്നിലെത്തിയത്.
2748.3 ആണ് പ്രഗ്നാനന്ദയുടെ ഫിഡെ റേറ്റിങ്. വിശ്വനാഥൻ ആനന്ദിൻ്റേത് 2748 ആണ്. നെതർലൻഡ്‌സിലെ വിജ് ആൻ സീയിൽ നടക്കുന്ന ടൂർണമെൻ്റിലെ നാലാം റൗണ്ട് പോരാട്ടത്തിലാണ് പ്രഗ്നാനന്ദ ലോക ചാമ്പ്യനെ മറികടന്നത്. ടാറ്റ സ്‌റ്റീസ്‌ ചെസിൽ ആദ്യ നാല് റൗണ്ടുകളിലെ പ്രഗ്നാനന്ദയുടെ ആദ്യ വിജയമാണിത്. ആദ്യ റൗണ്ടുകളിൽ സമനിലയായിരുന്നു ഫലം.
ക്ലാസിക്കൽ ചെസിൽ നിലവിലെ ലോകചാമ്പ്യനെ തോൽപിക്കുന്ന രണ്ടാമത്തെ ഇന്ത്യൻ താരമാണ് പ്രഗ്നാനന്ദ. വിശ്വനാഥൻ ആനന്ദാണ് ഈ നേട്ടം സ്വന്തമാക്കുന്ന ആദ്യ താരം.
