ലോകകപ്പിൽ പങ്കെടുക്കാനായി പാക്കിസ്ഥാൻ ക്രിക്കറ്റ് ടീമിന് അവസാന നിമിഷം വിസ അനുവദിച്ച് ഇന്ത്യ. ലോകകപ്പിനായി ഇന്ത്യയിലേക്ക് പുറപ്പെടേണ്ടതിന് 11 മണിക്കൂർ മുമ്പാണ് താരങ്ങൾക്ക് വിസ അനുവദിച്ചത്. ദിവസങ്ങളായുള്ള പാക്കിസ്ഥാൻ താരങ്ങളുടെ മാനസിക സമ്മർദ്ദമാണ് ഇതോടെ അവസാനിച്ചത്. ഒക്ടോബർ അഞ്ചിനാണ് ലോകകപ്പ് മത്സരങ്ങൾ ആരംഭിക്കുന്നത്. അതിനുമുന്നോടിയായി ടീമുകൾ സന്നാഹമത്സരങ്ങൾ കളിക്കും.
വിസ വൈകുന്നതുമായി ബന്ധപ്പെട്ട് പാക്കിസ്ഥാൻ ക്രിക്കറ്റ് ബോർഡ് ഐ.സി.സിയ്ക്ക് കത്തയച്ചിരുന്നു. ഇതിനുപിന്നാലെയാണ് നടപടി. ലോകകപ്പിലെ ചില ടീമുകൾ ഇതിനോടകം ഇന്ത്യയിലെത്തിക്കഴിഞ്ഞു. വിസ ലഭിച്ചതിന് പിന്നാലെ ബാബർ അസം നയിക്കുന്ന പാക്കിസ്ഥാൻ ടീം ഇന്ത്യയിലേക്ക് യാത്ര തിരിച്ചു. ദുബായിലെത്തിയ ശേഷമാണ് ടീം ഹൈദരാബാദിലേക്ക് പറക്കുക. ആദ്യ പരിശീലനമത്സരത്തിൽ വെള്ളിയാഴ്ച പാക്കിസ്ഥാൻ ന്യൂസീലൻഡിനെ നേരിടും.
