ഖത്തർ എയർവേയ്‌സിൻ്റെ ആഗോള ബ്രാൻഡ് അംബാസഡറും വെൽനസ് അഡ്വൈസറും ആയി ടെന്നീസ് ഇതിഹാസമായ നൊവാക് ദ്യോക്കോവിച്ച്. ഖത്തറിലെ ആൾട്ടിറ്റ്യൂഡ് വെൽനസ് സെൻ്ററിലാണ് സഹകരണ കരാർ പ്രഖ്യാപിച്ചത്. പുതിയ പങ്കാളിത്തത്തിൻ്റെ ഭാഗമായി ATP 500 ഇവൻ്റായ ഖത്തർ എക്സോൺമോബിൽ (ExxonMobil) ഓപ്പൺ മെച്ചപ്പെടുത്താൻ ജോക്കോവിച്ച് ഖത്തർ എയർവേയ്‌സുമായി സഹകരിക്കും.
മുൻനിര ടെന്നീസ് കളിക്കാരെ ആകർഷിക്കുക, ടൂർണമെൻ്റിനുള്ള ആഗോളശ്രദ്ധ വികസിപ്പിക്കുക, കായികരംഗത്തെ ഒരു പ്രധാന ഇവൻ്റ് എന്ന നിലയിൽഖത്തർ എക്സോൺമോബിലിൻ്റെ പ്രശസ്‌തി വർദ്ധിപ്പിക്കുക എന്നീ കാര്യങ്ങളിലാണ് ദ്യോക്കോവിച്ച് ആദ്യ ശ്രദ്ധ പതിപ്പിക്കുക.
ജോക്കോവിച്ചും ഖത്തർ എയർവേയ്‌സും പുതിയ സഹകരണത്തിൽ സന്തോഷം പ്രകടിപ്പിച്ചു. എയർലൈനിൻ്റെ മികച്ച സേവനത്തിനെയും യാത്രക്കാരുടെ ക്ഷേമത്തിൽ ശ്രദ്ധ കേന്ദ്രീകരിക്കുന്നതിനെയും ദ്യോക്കോവിച്ച് പ്രശംസിച്ചു. ജോക്കോവിച്ചുമായി സഹകരക്കാനായതിൽ അഭിമാനമെന്ന് ഖത്തർ എയർവേയ്‌സ് സിഇഒ ബദർ മുഹമ്മദ് അൽ മീറും പറഞ്ഞു.
ലോകത്തിലെ ഏറ്റവും മികച്ച എയർലൈൻ എന്ന അംഗീകാരം ഈ വർഷം ഖത്തർ എയർവേയ്‌സ് സ്വന്തമാക്കിയിരുന്നു. 24 ഗ്രാൻഡ് സ്ലാം കിരീടങ്ങളും 2024 ലെ പാരീസ് ഒളിമ്പിക്‌സിൽ സ്വർണ്ണമെഡലും നേടിയ ചരിത്രത്തിലെ ഏറ്റവും മികച്ച ടെന്നീസ് കളിക്കാരിൽ ഒരാളാണ് നൊവാക് ദ്യോക്കോവിച്ച്
