ഖത്തര്‍ ലോകകപ്പിന് ഇനി ദിവസങ്ങൾ മാത്രം ശേഷിക്കെ ഖത്തറിൽ മാത്രമല്ല, ഇവിടെ കേരളത്തിലും ആവേശത്തിനും വെല്ലുവിളിക്കും തീരെ പഞ്ഞമില്ല. കട്ടൗട്ടുകളും ഫ്ളക്സുകളും കൊണ്ട് നിറഞ്ഞിരിക്കുകയാണ് നാട്. ഇതിൽ ലോകം മുഴുവൻ വൈറലായ ഒരു കട്ടൗട്ടുണ്ട്. മറ്റാരുമല്ല, മെസ്സിയുടേതാണ് കട്ടൗട്ട്.
കോഴിക്കോട് പുള്ളാവൂർ ഗ്രാമത്തിലെ പുഴയുടെ നടുവിലുയർന്ന ഈ കൂറ്റൻ കട്ടൗട്ട് ലോകമെമ്പാടുമുള്ള അർജന്‍റീന ആരാധകർ ഷെയർ ചെയ്ത് വൈറലാക്കിയിരുന്നു.
തൊട്ടുപിന്നാലെ, ലവലേശം വിട്ടുകൊടുക്കാനില്ലെന്ന് തെളിയിച്ച് മെസ്സിയുടെ 30 അടി കട്ടൗട്ടിന് മറുപടിയായി നെയ്മറിൻ്റെ 40 അടി കട്ടൗട്ടാണ് അതേ പുഴയിൽ ബ്രസീൽ ആരാധകർ ഉയർത്തിയിരിക്കുന്നത്. ഇനി ഏതെല്ലാം ടീം ആരാധകർ രംഗത്തെത്തും എന്നാണ് നാട് കാത്തിരിക്കുന്നത്.
മൂന്ന് ദിവസം മുമ്പായിരുന്നു പുള്ളാവൂരിലെ അര്‍ജൻ്റീന ആരാധകര്‍ ചെറുപുഴയിൽ നീലയും വെള്ളയും ജേഴ്‌സിയണിഞ്ഞ മെസ്സിയുടെ 30 അടിക്ക് മുകളില്‍ ഉയരമുള്ള കൂറ്റന്‍ കട്ടൗട്ട് സ്ഥാപിച്ചത്. ഫോക്‌സ് സ്‌പോര്‍ട്‌സ് ഉള്‍പ്പെടെയുള്ള അന്താരാഷ്ട്ര മാധ്യമങ്ങൾ ഇത് വാർത്തയാക്കിയിരുന്നു. കൂടാതെ അര്‍ജൻ്റീന ടീം ഔദ്യോഗിക ഫേസ്ബുക്ക് പേജിലും ഈ കട്ടൗട്ട് താരമായിരുന്നു.
