കാനഡ ഓപ്പൺ സൂപ്പർ 500 ബാഡ്മിന്റൺ കിരീടം സ്വന്തമാക്കി ഇന്ത്യൻ താരം ലക്ഷ്യ സെൻ. ഫൈനലിൽ ചൈനയുടെ ലി ഷിഫെങ്ങിനെ നേരിട്ടുള്ള ഗെയിമുകൾക്ക് പരാജയപ്പെടുത്തിയാണ് 21-കാരനായ ലക്ഷ്യ സെൻ കിരീടത്തിൽ മുത്തമിട്ടത്. താരത്തിന്റെ രണ്ടാം സൂപ്പർ 500 കിരീടമാണിത്. 2022-ലെ ഇന്ത്യ ഓപ്പൺ മത്സരത്തിലും താരം കിരീടം ചൂടിയിരുന്നു.
കടുത്ത പോരാട്ടത്തിനൊടുവിലാണ് താരം ലി ഷിഫെങ്ങിനെ കീഴടക്കിയത്. 21-18, 22-20 ആയിരുന്നു സ്കോർ നില. ജപ്പാന്റെ കെന്റാ നിഷിമോട്ടോയെ നേരിട്ടുള്ള ഗെയിമുകൾക്ക് പരാജയപ്പെടുത്തിയാണ് ലക്ഷ്യ ഫൈനിലിൽ പ്രവേശിച്ചത്.
2022 ഓഗസ്റ്റിൽ നടന്ന ബർമിങ്ങാം കോമൺവെൽത്ത് ഗെയിംസിലാണ് ലക്ഷ്യ അവസാനമായി ഫൈനൽ കളിച്ചത്. അതിനുശേഷം മികച്ച പ്രകടനം കാഴ്ചവെക്കാൻ സാധിക്കാതിരുന്ന താരം റാങ്കിങ്ങിൽ 19-ാം സ്ഥാനത്തേക്ക് പിൻതള്ളപ്പെട്ടിരുന്നു. എന്നാൽ കാനഡ ഓപ്പണിൽ കിരീടം ചൂടിയതോടെ പഴയസ്ഥാനം നേടുമെന്ന കാര്യത്തിൽ സംശയമില്ല.
