കളിക്കളത്തിലേക്ക് മടങ്ങിവരാനൊരുങ്ങി കെ.എൽ രാഹുൽ. ഐപിഎൽ മത്സരത്തിൽ പരിക്കേറ്റ് ചികിത്സയിലായിരുന്ന രാഹുലിന്റെ തിരിച്ചുവരവ് ഇന്ത്യക്ക് വളരെ ആശ്വസമാകും. ബാംഗ്ലൂരിലെ ദേശീയ ക്രിക്കറ്റ് അക്കാദമിയിൽ പരിശീലനം തുടങ്ങിയതിന്റെ ചിത്രങ്ങൾ രാഹുൽ തന്നെയാണ് സാമൂഹ്യമാധ്യമങ്ങളിൽ പങ്കുവെച്ചിരിക്കുന്നത്.
മെയ് ഒന്നിന് നടന്ന ലക്നൗ സൂപ്പർ ജയന്റ്സ് – റോയൽ ചാലഞ്ചേഴ്സ് ബാംഗ്ലൂർ മത്സരത്തിനിടെയാണ് ലക്നൗ ക്യാപ്റ്റനായിരുന്ന രാഹുലിന്റെ തുടയ്ക്ക് പരിക്കേറ്റത്. അതോടെ സീസണിലെ ശേഷിക്കുന്ന മത്സരങ്ങൾ രാഹുലിന് നഷ്ടമാവുകയായിരുന്നു. തുടർന്ന് ലണ്ടനിൽ ശസ്ത്രക്രിയ നടത്തിയ ശേഷമാണ് താരം തിരിച്ചുവരാനൊരുങ്ങുന്നത്.
ജൂലൈ 12ന് ആരംഭിക്കുന്ന ഇന്ത്യയുടെ വിൻഡീസ് പര്യടനത്തിൽ രാഹുൽ കളിക്കുമോയെന്ന കാര്യം വ്യക്തമല്ല. സെപ്റ്റംബറിൽ നടക്കുന്ന ഏഷ്യാകപ്പ് മത്സരങ്ങളാണ് രാഹുൽ ലക്ഷ്യമിടുന്നതെന്ന വാർത്തകളും പ്രചരിക്കുന്നുണ്ട്. എന്തായാലും രാഹുലിന്റെ തിരിച്ചുവരവ് ഇന്ത്യൻ ടീമിന് ആശ്വാസമാകും എന്ന കാര്യം തീർച്ചയാണ്.
റോയൽ ചലഞ്ചേഴ്സ് ബാംഗ്ലൂരിനെതിരായ മത്സരത്തിൽ പരിക്കേറ്റിട്ടും പതിനൊന്നാം നമ്പരിൽ ബാറ്റിംഗിനിറങ്ങി ആരാധകരെ രാഹുൽ ഞെട്ടിച്ചു. ഓടാനോ നടക്കാനോ പോലും കഴിയാതിരുന്ന രാഹുൽ കളിക്കാൻ എത്തിയത് ക്രിക്കറ്റ് പ്രേമികളെ ആവേശത്തിലാഴ്ത്തിയിരുന്നു.
