ഓസ്ട്രേലിയയ്ക്കെതിരായ ഏകദിന പരമ്പരയിലെ ഒന്നാം മത്സരത്തിൽ ഇന്ത്യയ്ക്ക് 277 റൺസിന്റെ വിജയലക്ഷ്യം. ടോസ് നേടി ബാറ്റിങ്ങിനിറങ്ങിയ ഓസ്ട്രേലിയ 50 ഓവറിൽ 276 റൺസിന് പുറത്തായി. മികച്ച പ്രകടനം പുറത്തെടുത്ത ഇന്ത്യയുടെ ബൗളർമാരാണ് ഓസ്ട്രേലിയയെ പരാജയപ്പെടുത്തിയത്. ഇന്ത്യയ്ക്ക് വേണ്ടി പേസ് ബൗളർ മുഹമ്മദ് ഷമി അഞ്ച് വിക്കറ്റ് നേടി. ഷമി 10 ഓവറിൽ 51 റൺസ് വഴങ്ങി അഞ്ച് വിക്കറ്റെടുത്തപ്പോൾ ജസ്പ്രീത് ബുംറ, രവിചന്ദ്ര അശ്വിൻ, രവീന്ദ്ര ജഡേജ എന്നിവർ ഓരോ വിക്കറ്റ് വീതം സ്വന്തമാക്കി.
നാല് റൺസെടുത്ത ഓപ്പണർ മിച്ചൽ മാർഷിനെയാണ് ഷമി ആദ്യം പുറത്താക്കിയത്. പിന്നീട് ക്രീസിലൊന്നിച്ച ഡേവിഡ് വാർണറും സ്റ്റീവ് സ്മിത്തും ചേർന്ന് 94 റൺസ് നേടി ടീമിനെ സംരക്ഷിച്ചു. അർധസെഞ്ച്വറി നേടിയ ഡേവിഡ് വാർണറാണ് ഓസ്ട്രേലിയയുടെ ടോപ് സ്കോറർ. എന്നാൽ 52 റൺസെടുത്ത വാർണറെ പുറത്താക്കി ജഡേജ ഈ കൂട്ടുകെട്ട് പൊളിച്ചതോടെ ഓസ്ട്രേലിയ തകരാൻ ആരംഭിച്ചു. പിന്നാലെ 39 റൺസെടുത്ത സ്മിത്തിനെ ഷമി ക്ലീൻ ബൗൾഡാക്കി. സ്മിത്തിന് പകരം വന്ന കാമറൂൺ ഗ്രീനും ലബൂഷെയ്നും ചേർന്ന് ടീം സ്കോർ 150 കടത്തി. 39 റൺസെടുത്ത ലബൂഷെയ്നിനെ അശ്വിൻ പുറത്താക്കിയപ്പോൾ അനാവശ്യ റണ്ണിന് ശ്രമിച്ച കാമറൂൺ ഗ്രീൻ റൺ ഔട്ടായി.
പിന്നീട് ക്രീസിലൊന്നിച്ച ജോഷ് ഇംഗ്ലിസും മാർക്കസ് സ്റ്റോയിനിസും ചേർന്ന് ടീം സ്കോർ 200 കടത്തി. എന്നാൽ 47-ാം ഓവറിൽ സ്റ്റോയിനിസിനെ ഷമി ഔട്ടാക്കി. തൊട്ടടുത്ത ഓവറിൽ 45 റൺസെടുത്ത ഇംഗ്ലിസിനെ ബുംറയും പുറത്താക്കി. പിന്നാലെ വന്ന മാറ്റ് ഷോർട്ട് (2), സീൻ അബോട്ട് (2) എന്നിവരെ പുറത്താക്കി ഷമി അഞ്ചുവിക്കറ്റ് നേട്ടം പൂർത്തിയാക്കി. അവസാന വിക്കറ്റിൽ ഓസീസ് നായകൻ പാറ്റ് കമ്മിൻസ് ടീം സ്കോർ 276-ൽ എത്തിച്ചു. കമ്മിൻസ് ഒൻപത് പന്തിൽ 21 റൺസെടുത്ത് പുറത്താവാതെ നിന്നു.
