ലോകകപ്പ് നേടിയ ഓസ്ട്രേലിയൻ ടീമിനെ ഇന്ന് രണ്ടാം ട്വന്റി 20 മത്സരത്തിൽ ഇന്ത്യ നേരിടും. തിരുവനന്തപുരം കാര്യവട്ടം ഗ്രീൻഫീൽഡ് സ്റ്റേഡിയത്തിൽ രാത്രി ഏഴ് മണി മുതലാണ് മത്സരം നടക്കുക. ആദ്യ മത്സരത്തിൽ വിജയിച്ചതിന്റെ ആത്മവിശ്വാസത്തിലാണ് ഇന്ത്യ ഇന്ന് കളത്തിറങ്ങുന്നത്. ആദ്യ മത്സരത്തിൽ ഇന്ത്യ രണ്ട് വിക്കറ്റിനാണ് ജയിച്ചത്.
ആദ്യകളിയിൽ തിളങ്ങിയ നായകൻ സൂര്യകുമാർ യാദവ്, ഇഷാൻ കിഷൻ, റിങ്കു സിങ് എന്നിവർ ഈ മത്സരത്തിലും ശോഭിക്കുമെന്ന പ്രതീക്ഷയിലാണ് ആരാധകർ. മുൻനിര ബാറ്റർമാരായ ഋതുരാജ് ഗെയ്ക്വാദ്, യശസ്വി ജയ്സ്വാൾ, ഓൾറൗണ്ടർമാരായ ശിവം ദുബായ്, അക്ഷർ പട്ടേൽ, വാഷിങ്‌ടൺ സുന്ദർ, ബൗളർമാരായ അർഷദീപ് സിങ്, രവി ബിഷ്‌ണോയ്, ആവേശ് ഖാൻ, പ്രസിദ്ധ് കൃഷ്ണ എന്നിവരും ഇന്ന് കളത്തിലിറങ്ങും. ഏകദിന ലോകകപ്പ് വിജയിച്ച ഏഴ് താരങ്ങളായ ക്യാപ്റ്റൻ മാത്യു വെയ്‌ഡ്, ട്രാവിസ് ഹെഡ്, ജോഷ് ഇംഗ്ളിസ്, സ്റ്റീവൻ സ്‌മിത്ത്, ഗ്ലെൻ മാക്സ്വെൽ, മാർക്കസ് സ്റ്റോയിനിസ്, ജേസൺ ബെൻഡ്രോഫ്, ആദം സാംപ തുടങ്ങിയവരാണ് ഓസീസിനായി കളിക്കുക.
ഇന്നത്തെ മത്സരത്തിന് മുന്നോടിയായി ശനിയാഴ്ച ഇരുടീമുകളും കാര്യവട്ടത്ത് പരിശീലനത്തിനിറങ്ങിയിരുന്നു. രാവിലെ എത്തിയ ഓസ്ട്രേലിയൻ ടീം ഗ്രൗണ്ടിലും നെറ്റ്സിലും പരിശീലനം നടത്തിയിരുന്നു. വൈകീട്ട് ഇന്ത്യൻ ടീമും ഗ്രൗണ്ടിൽ പരിശീലനത്തിനിറങ്ങി.
