ഐപിഎല്ലിന്റെ തുടക്കം മുതൽ മികച്ച പ്രകടനത്താൽ ക്രിക്കറ്റ് ആരാധകരുടെ മനം കവരുന്ന ടീമാണ് രാജസ്ഥാൻ റോയൽസ്. ടീമിന്റെ നായകനായ സഞ്ജു സാംസണും നിരവധി പ്രശംസ ഏറ്റുവാങ്ങിയിട്ടുണ്ട്. കളിയുടെ ഇടിയിൽ സഞ്ജു എടുക്കുന്ന പല തീരുമാനങ്ങളും ടീമിനെ വിജയത്തിലേയ്ക്ക് നയിക്കുന്നതായിരുന്നു. എന്നാൽ ഈ സീസണിൽ പലപ്പോഴായി സ്‌പിന്നർ ആർ.അശ്വിനെ ബാറ്റിങ് പൊസിഷനിൽ നേരത്തെ ഇറക്കാനുള്ള സഞ്ജുവിന്റെ തീരുമാനത്തെ രൂക്ഷമായി വിമർശിക്കുകയാണ് ആരാധർ.
കഴിഞ്ഞ ദിവസം കൊൽക്കത്ത നൈറ്റ് റൈഡേഴ്‌സിനെതിരെ വിജയലക്ഷ്യത്തിലേക്ക് ബാറ്റ് ചെയ്യുന്നതിനിടെയാണ് അശ്വിനെ അവസാനമായി സഞ്ജു നേരത്തെ ഇറക്കിയത്‌. ടീം സ്കോർ 4ന് 100 എന്ന നിലയിൽ നിൽക്കവെയാണ് അശ്വൻ ക്രീസിലെത്തിയത്. രാജസ്ഥാൻ ഇന്നിങ്സിന്റെ 9-ാം ഓവറിലായിരുന്നു ഇത്. എന്നാൽ റൺറേറ്റ് ഉയർത്തേണ്ട നിർണായക സമയത്ത് സ്കോർ കണ്ടെത്താൻ അശ്വിൻ ബുദ്ധിമുട്ടുകയായിരുന്നു. ഇതോടെ റോയൽസ് സമ്മർദ്ദത്തിലുമായി.
അശ്വിൻ 11 പന്തിൽ 8 റൺസ് മാത്രം നേടി മടങ്ങി. ആകെ ഒരു ബൗണ്ടറി മാത്രമാണ് താരത്തിന് നേടാനായത്. വമ്പനടികൾക്ക് പേരുകേട്ട പല താരങ്ങളും ഉണ്ടായിട്ടും അശ്വിനെ നേരത്തെ ഇറക്കാനുള്ള തീരുമാനമെടുത്തത് എന്തിനാണെന്നാണ് ആരാധകർ ഒന്നടങ്കം സഞ്ജുവിനോട് ചോദിക്കുന്നത്. ഇനിയും ഇത്തരം സമ്മർദ്ദങ്ങൾ ഉണ്ടാകാതിരിക്കാൻ താരങ്ങളെ കളത്തിലിറക്കുമ്പോൾ രണ്ടാമതൊന്ന് ആലോചിക്കണമെന്നും ക്രിക്കറ്റ് ലോകം വ്യക്തമാക്കി.
