അന്താരാഷ്ട്ര മത്സരങ്ങളില്‍ നിന്ന് വിരമിക്കാനൊരുങ്ങി അർജൻ്റീനയുടെ എക്കാലത്തെയും മികച്ച താരങ്ങളിലൊരാളായ എയ്ഞ്ജൽ ഡി മരിയ. 2024 കോപ്പ അമേരിക്ക ചാമ്പ്യൻഷിപ്പിന് ശേഷം അന്താരാഷ്ട്ര മത്സരങ്ങളില്‍ നിന്ന് വിരമിക്കുമെന്നാണ് താരം ഇൻസ്റ്റഗ്രാമിലൂടെ വ്യക്തമാക്കിയത്.
കഴിഞ്ഞ 15 വർഷമായി അർജന്റീനയ്ക്ക് വേണ്ടി കളിക്കുന്ന താരമാണ് 35 കാരനായ എയ്ഞ്ജല്‍ ഡി മരിയ. 2008-ൽ ദേശീയ ടീമിനായി അരങ്ങേറ്റം കുറിച്ച താരം അർജന്റീനയ്ക്ക് വേണ്ടി ഇതുവരെ 136 മത്സരങ്ങളിൽ കളത്തിലിറങ്ങിയിട്ടുണ്ട്. നാല് ലോകകപ്പുകളിലും ആറ് കോപ്പ അമേരിക്ക ടൂർണമെൻ്റുകളിലും താരം പങ്കെടുത്തിരുന്നു.
നിലവിൽ ക്ലബ്ബ് തലത്തിൽ ബെൻഫിക്കയ്ക്ക് വേണ്ടിയാണ് എയ്ഞ്ജല്‍ ഡി മരിയ കളിക്കുന്നത്. റയൽ മഡ്രിഡ്, പി.എസ്.ജി, യുവന്റസ്, മാഞ്ചെസ്റ്റർ യുണൈറ്റഡ് തുടങ്ങിയ ക്ലബ്ബുകൾക്കുവേണ്ടിയും താരം കളത്തിലിറങ്ങിയിട്ടുണ്ട്. 2024 ജൂൺ 20 മുതൽ ജൂലായ് 14 വരെയാണ് അമേരിക്കയിലാണ് കോപ്പ അമേരിക്ക ചാമ്പ്യൻഷിപ്പ് നടക്കുന്നത്.
