പണ്ട് ആകാശത്ത് വിമാനം പറക്കുന്നത് കണ്ട് ഏതൊരുകുട്ടിയേയും പോലെ അതിലൊന്ന് കയറാനും കേട്ടുകേൾവി മാത്രമുളള വിദേശ നാടുകൾ കാണാനും സ്വപ്നംകണ്ട കാലത്തുനിന്ന് ലോകത്തിലെ മഹാനഗരമായ ദുബായിലിരുന്ന് ജീവിത വിശേഷങ്ങളുടേയും എട്ട് പതിറ്റാണ്ടിനിടെ കടന്നുപോയ അനുഭവങ്ങളുടേയും കഥകൾ പറയുകയാണ് സേതുലക്ഷ്മിയമ്മ. അഭിനയത്തെ ജീവിതത്തിൽ ആവാഹിച്ച ഒരമ്മ, നൂറിലധികം സിനിമകളിലൂടെ മലയാളിയുടെ മനസ്സിലേക്ക് ചേക്കേറിയ സേതുലക്ഷ്മിയമ്മ.
കൊല്ലം നിലമേൽ എന്ന ഗ്രാമത്തിൽ നിന്നാണ് സേതുലക്ഷ്മിയമ്മയുടെ കലയുടേയും ജീവിതത്തിൻ്റേയും തുടക്കം. സഹോദരങ്ങൾക്കൊപ്പം നൃത്തത്തിലാണ് കലാപരമായ പഠനം തുടങ്ങിയത്. എന്നാൽ പ്രതിഭകൊണ്ട് മറ്റുളളവരേക്കാൾ വളരെ മുന്നിലെത്തുകയും തൻ്റെ വഴി കലാരംഗമാണെന്ന് തിരിച്ചറിയുകയുമായിരുന്നു സേതുലക്ഷ്മി.
ദാരിദ്ര്യത്തിൻ്റേയും വിലക്കുകളുടേയും പഴയ കാലത്ത് തൻ്റെ നിർബന്ധത്തിന് വഴങ്ങിയാണ് നൃത്തത്തിൽ ഉപരിപഠനത്തിന് വീട്ടുകാർ അനുവദിച്ചത്. നടനഭൂഷണമെന്ന സർട്ടിഫിക്കറ്റ് കയ്യിലെത്തിയതോടെ കലാകാരിയെ തേടി അവസരങ്ങളെത്തി. പിന്നെ നൃത്ത വേദികളിൽ നിന്ന് നാടകങ്ങളിലേക്ക് മാറ്റം. ലോകം കണ്ടിട്ടില്ലാത്ത ഒരു സ്ത്രീയായിരുന്നെങ്കിലും കിട്ടിയ അവസരങ്ങൾ എല്ലാം നേട്ടത്തിലെത്തിയെന്ന് സേതുലക്ഷ്മിയമ്മ പറയുന്നു.
കെപിഎസി ഉൾപ്പടെ പ്രമുഖ നാടകസമിതികളിൽ ശ്രദ്ധേയവേഷങ്ങൾ ചെയ്തു. തിലകനും രാജൻ. പി. ദേവും ഉൾപ്പെടെ പ്രമുഖർക്കൊപ്പം വേദി പങ്കിട്ടു. കുറത്തിക്കല്യാണിയടക്കം നിരവധി വേഷങ്ങൾ പകർന്നാടി. ഇക്കാലത്തിനിടെ നാടക സമിതിയിൽ ഒപ്പം പ്രവർത്തിച്ച മേക്കപ്പ് ആർട്ടിസ്റ്റിനൊപ്പം പുതുജീവിതത്തിനും തുടക്കമിട്ടു. എന്നാൽ പ്രാരാബ്ദങ്ങൾ പെരുകിയതോടെ ആ ബന്ധം മുറിഞ്ഞു.
സങ്കടക്കടലുകളെ ഒറ്റക്ക് മറികടന്ന കാലത്ത് താൻ ആരുമല്ലെന്ന തിരിച്ചറിവ് മുന്നോട്ടുപോകാനുളള കരുത്തായി മാറി. അരങ്ങുകൾ സിനിമയ്ക്കും സീരിയലിനും വഴിമാറി. മോഹൻലാലും മമ്മൂട്ടിയും ഉൾപ്പെടെ താരരാജാക്കൻമാർക്കൊപ്പം സിനിമകളിൽ വേഷമിട്ടു. ധനുഷിനൊപ്പം തമിഴിലും ശ്രദ്ധേയ വേഷം ചെയ്യാനായി. ഇതര ഭാഷകളിലും സാനിധ്യമറിയിച്ച സേതുലക്ഷ്മിയമ്മ മഞ്ജുവാര്യരുടെ ഹൌ ഓൾഡ് ആർയുവിൽ നടത്തിയ പ്രകടനം മലയാളികളുടെ ഹൃദയം കീഴടക്കി.
സിനിമയായാലും ജീവിതമായാലും സേതുലക്ഷ്മിഅമ്മയ്ക്ക് ഓരോന്നിലും കാഴ്ച്പാടുകളുണ്ട്.. ഓരോ ചുവടുവയ്പ്പിലും നിലപാടുകളുകളുമുണ്ട്. സമ്പാദ്യങ്ങൾ കൂട്ടിവയ്കക്കുന്ന ശീലമില്ല,
കടം പറയുന്ന ശീലവുമില്ല. എന്നാൽ കടപ്പാടുകൾ ഏറെയുണ്ടെന്നും സേതുലക്ഷ്മിയമ്മ വ്യക്തമാക്കുന്നു.
മകൻ കിഷോറിൻ്റെ വൃക്കമാറ്റിവയ്ക്കൽ ശസ്ത്രക്ക്രിയക്ക് മോഹൻലാൽ ഉൾപ്പെടെ നിരവധി ആളുകൾ സഹായമെത്തിച്ചതും ഓർത്തെടുക്കുകയാണ് സേതുലക്ഷ്മിയമ്മ. കുടുംബത്തെ ഓർത്ത് ആധിയുണ്ടെങ്കിലും മക്കളെ സ്വതന്ത്രരാക്കി വിടാനാണ് സേതുലക്ഷ്മിയമ്മയ്ക്കിഷ്ടം.
മകൾക്കൊപ്പം ദുബായിൽ എത്തിയെങ്കിലും പഴയകാലവും ജീവിതവുമാണ് ഇഷ്ടമെന്ന് സേതുലക്ഷ്മിയമ്മ വെളിപ്പെടുത്തുന്നു. സ്വാതന്ത്ര്യത്തിന് മുൻപേ ജനിച്ചതാണ്. എൺപത് വയസ്സായെങ്കിലും കുട്ടിയായിരിക്കാനാണ് മോഹം. നാടൻ ഭക്ഷണത്തോടാണ് പ്രിയം.
ഇപ്പോഴും പുതിയ സിനിമകളിലും സീരിയലുകളിലും നിരവധി വേഷങ്ങൾ കിട്ടുന്നുണ്ട്. വേഷമായാലും കാശായാലും കിട്ടുന്നത് മതി എന്നതാണ് രീതിയെന്നും സേതുലക്ഷ്മിയമ്മ പറയുന്നു. കുട്ടിക്കാലത്തെ സ്വപ്നങ്ങൾ പലതും നേടാനായി, അനുഭവങ്ങൾ പലത് പിന്നിട്ടു. കാലങ്ങൾ കഴിയണം എന്നതിനപ്പുറം അതിമോഹമില്ലെന്നാണ് സേതുലക്ഷ്മിയമ്മയുടെ വാക്കുകൾ.
