ജനപ്രിയ തീരുമാനങ്ങളുമായി കർണ്ണാടക മുഖ്യമന്ത്രി സിദ്ധരാമയ്യ. തൻറെ വാഹനം കടന്ന് പോകുമ്പോൾ മറ്റ് വാഹനങ്ങൾ തടഞ്ഞ് ഗതാഗതം സുഗമമാക്കേണ്ടെന്ന് മുഖ്യമന്ത്രി നിർദേശം നൽകിയിരുന്നു. അതിന് പിന്നാലെയാണ് പുത്തൻ തീരുമാനവും വെളിപ്പെടുത്തിയിരിക്കുന്നത്.
പൊതു, സ്വകാര്യ ചടങ്ങുകളിൽ ആദരവിൻറെ ഭാഗമായി പൂക്കളും ഷാളുകളും സ്വീകരിക്കില്ലെന്നാണ് സിദ്ധരാമയ്യ അറിയിച്ചത്. ആളുകൾക്ക് അവരുടെ സ്നേഹവും ആദരവും പ്രകടിപ്പിക്കാൻ സമ്മാനമെന്ന നിലയിൽ ഇനി പുസ്തകങ്ങൾ നൽകാം.
അതേസമയം സീറോ ട്രാഫിക് പ്രോട്ടോക്കോൾ മാറ്റാൻ കമ്മീഷണർക്ക്‌ മുഖ്യമന്ത്രി നിർദ്ദേശം നൽകി. മറ്റ് വാഹനങ്ങൾ തടയുന്നത് മൂലം ജനങ്ങൾക്കുണ്ടാകുന്ന ബുദ്ധിമുട്ട് നേരിട്ട് കണ്ടതിനാലാണ് നിർദേശമെന്നും സിദ്ധരാമയ്യ വ്യക്തമാക്കി. ഈ തീരുമാനത്തിന് വൻ ജനപിന്തുണയാണ് ലഭിക്കുന്നത്.
