ഈ ഇരട്ടക്കുട്ടികൾ ആരാണെന്നല്ലെ ? ഭാവി ദുബായിയെ നയിക്കേണ്ട ഇളം തലമുറ. ദുബായ് കിരീടാവകാശി ശൈഖ് ഹംദാന് ബിൻ റാഷിദ് അൽ മക്തൂം തന്‍റെ ഇരട്ടക്കുട്ടികളുടെ ഒന്നാം പിറന്നാളിനോടനുബന്ധിച്ച് പങ്കുവച്ച ചിത്രമാണ് ശ്രദ്ധേയമാകുന്നത്.
ഇന്നലെ എടുത്തതുപോലെ.. ഈ ചിത്രം പകര്‍ത്തിയിട്ട് ഒരുവര്‍ഷമായെന്ന് തോന്നുന്നേയില്ല.. രാജകുമാരന്‍ ഇസ്റ്റഗ്രാമില്‍ പങ്കുവെച്ച ചിത്രത്തിനടിയില്‍ കുറിച്ചു. തന്‍റെ കുഞ്ഞുങ്ങൾക്കൊപ്പം ലോകത്തിലെ എല്ലാ കുട്ടികൾക്കും ശൈഖ് ഹംദാന് ജന്മദിനാശംസകളും നേര്‍ന്നു.
കുഞ്ഞുങ്ങളെ ഇരുവരേയും തന്‍റെ നെഞ്ചോട് ചേര്‍ത്തുവച്ചിരിക്കുന്ന ശൈഖ് ഹംദാന്‍റെ ചിത്രത്തില്‍ വാത്സല്യവും പിതൃത്വത്തിന്‍റെ അഭിമാനവുമൊക്കെ പ്രകടമാണ്. 2021 മെയ് 20നാണ് ശൈഖ് ഹംദാന് ഇരട്ടക്കുട്ടികൾ പിറന്നത്. അന്നെടുത്ത ചിത്രമാണ് രാജകുമാരന്‍ പങ്കുവെച്ചത്.
2019ല്‍ ആയിരുന്നു ശൈഖ് ഹംദാന്‍റെ വിവാഹം. ഭരണാധികാരികളും നിരവധി നേതാക്കളും പങ്കെടുത്ത ചടങ്ങില്‍ ഷെയ്ഖ ബിൻത് സയീദ് ബിൻ താനി അൽ മക്തൂമിനെ രാജകുമാരാന്‍ ജീവിതസഖിയാക്കുകയായിരുന്നു.
സോഷ്യല്‍ മീഡിയിയില്‍ നിരവധി ആരാധകരാണ് ശൈഖ് ഹംദാനുളളത്. അദ്ദേഹത്തിന് പരുന്തുകളോടും അഡംബര കപ്പലുകളോടും കാറുകളോടുമുളള ഇഷ്ടം ലോകപ്രശസ്തമാണ്. അദ്ദേഹം സോഷ്യല്‍ മീഡിയിയിലൂടെ പങ്കുവയ്ക്കുന്ന ചിത്രങ്ങൾ പിന്തുടരുന്നവരും ഏറെയുണ്ട്.
