പ്രധാനമന്ത്രി നരേന്ദ്രമോദി ഇന്ന് കേരളത്തിലെത്തും. ബിജെപി നടത്തുന്ന ‘സ്ത്രീശക്‌തി മോദിക്കൊപ്പം’ മഹിളാ സമ്മേളനത്തിൽ പങ്കെടുക്കാനാണ് പ്രധാനമന്ത്രി ഇന്ന് തൃശൂരിലെത്തുക. ഉച്ചയ്ക്ക് രണ്ട് മണിക്ക് ഹെലികോപ്റ്റർ മാർഗം കുട്ടനെല്ലൂർ ഹെലിപാഡിൽ വന്നിറങ്ങുന്ന മോദിക്കായി വൻ സുരക്ഷാ സന്നാഹങ്ങളാണ് തൃശൂരിൽ ഒരുക്കിയിരിക്കുന്നത്.
പ്രധാനമന്ത്രിയെ സ്വീകരിക്കാനുള്ള ഒരുക്കങ്ങൾ തൃശൂരിൽ പുർത്തിയായിട്ടുണ്ട്. നഗരത്തിലും പ്രധാനമന്ത്രി വരുന്ന വഴികളിലും മൂവായിരത്തിലധികം പൊലീസുകാരെയാണ് വിന്യസിപ്പിക്കുക. തേക്കിൻകാട് മൈതാനം ചുറ്റി ഒരു കിലോമീറ്റർ റോഡ് ഷോ സംഘടിപ്പിക്കും. ജനറൽ ആശുപത്രി പരിസരത്ത് നിന്ന് തുടങ്ങുന്ന റോഡ് ഷോ തെക്കേ ഗോപുരനട, മണികണ്ഠനാൽ, നടുവിലാൽ എന്നിവിടങ്ങളിലൂടെ സഞ്ചരിച്ച് നായ്ക്കനാലിലെ സമ്മേളന വേദിയിലെത്തും.
മൂന്ന് മണിക്ക് തേക്കിൻകാട് മൈതാനത്ത് നടക്കുന്ന സമ്മേളനത്തിൽ രണ്ട് ലക്ഷം വനിതകളെ പ്രധാനമന്ത്രി അഭിസംബോധന ചെയ്യും. തുടർന്ന് 4.30-ന് റോഡ് മാർഗം തിരികെ കുട്ടനെല്ലൂരിലെത്തി ഹെലികോപ്റ്ററിൽ പ്രധാനമന്ത്രി നെടുമ്പാശേരിയിലേക്ക് തിരിക്കും.
