ലോകസഭ തെരഞ്ഞെടുപ്പിന്റെ സ്ഥാനാർത്ഥി പ്രഖ്യാപനത്തിന് മുന്നേ തൃശൂരിൽ പ്രചരണം ആരംഭിച്ച് ബിജെപി പ്രവർത്തകർ. തൃശൂരിലെ ബിജെപി പ്രാദേശിക നേതാക്കളുടെ ഓട്ടോറിക്ഷകളിലാണ് സുരേഷ് ഗോപിയുടെ ചിത്രം പതിപ്പിച്ച പോസ്റ്ററുകൾ പ്രത്യക്ഷപ്പെട്ടത്. എന്നാൽ സ്വന്തം ഇഷ്ടപ്രകാരം പോസ്റ്ററുകൾ പതിപ്പിച്ചു എന്നാണ് ബിജെപി പ്രവർത്തകർ നൽകുന്ന വിശദീകരണം. ‘ചതിക്കില്ല എന്നത് ഉറപ്പാണ് വോട്ട് ഫോർ ബിജെപി’ എന്നാണ് പോസ്റ്ററിലെ വാചകം.
ലോകസഭ തെരെഞ്ഞെടുപ്പ് അടുക്കുമ്പോൾ അണിയറയിൽ നീക്കങ്ങൾ സജീവമാക്കുകയാണ് രാഷ്ട്രീയ പാർട്ടികൾ. അതിന്റെ ഭാഗമായി സ്ഥാനാർഥികളാവാൻ സാധ്യതയുള്ളവരെ മണ്ഡലത്തിൽ സജീവമാക്കുകയും ചെയ്യുന്നുണ്ട്. എന്നാൽ തൃശൂരിൽ ബിജെപി ഒരുപടി മുന്നിൽ നിന്നുകൊണ്ട് പരസ്യ പ്രചാരണം ആരംഭിച്ചിരിക്കുകയാണ്.
അതേസമയം രണ്ടുപ്രാവശ്യം മത്സരിച്ച് പരാജയപ്പെട്ട വ്യക്തിയാണ് സുരേഷ് ഗോപി. എന്നാൽ പരാജയപ്പെട്ടെങ്കിലും പല രീതിയിലുള്ള നല്ല പ്രവർത്തനങ്ങൾ അദ്ദേഹം ചെയ്യുന്നുണ്ട് എന്ന് പ്രാദേശിക നേതാക്കൾ പ്രതികരിച്ചു. അദ്ദേഹം നല്ലൊരു വ്യക്തിയാണെന്ന് മനസിലാക്കിയതുകൊണ്ടാണ് അദ്ദേഹത്തിന് പിന്തുണ നൽകി പരസ്യം പതിപ്പിച്ചത്. നല്ല ഭൂരിപക്ഷത്തോടെ അദ്ദേഹം വിജയിക്കുമെന്നാണ് പ്രതീക്ഷ. മാത്രമല്ല,നല്ലൊരു വ്യക്തിത്വത്തിന്റെ ഉടമയാണ് അദ്ദേഹം എന്നും പ്രദേശിക നേതാക്കൾ പറഞ്ഞു.
