ഓസ്ട്രേലിയയിലേക്ക് എത്തുന്ന ഇന്ത്യന്‍ പ്രധാനമന്ത്രി നരേന്ദ്ര മോദിക്ക്‌ വന്‍ വരവേല്‍പ്പൊരുക്കി ഓസ്ട്രേലിയയിലെ ഇന്ത്യൻ പ്രവാസികൾ. പ്രധാനമന്ത്രി എത്തുന്ന റാലിയില്‍ 20000 ആളുകളാണ് പങ്കെടുക്കുക. മൂന്ന് ദിവസമാണ് പ്രധാനമന്ത്രിയുടെ ഓസ്ട്രേലിയൻ സന്ദര്‍ശനം. പാപ്പുവ ന്യൂ ഗിനിയയില്‍ നിന്നാണ് പ്രധാനമന്ത്രി ഓസ്ട്രേലിയയിലേക്ക് എത്തുക. ജി 7 ഉച്ചകോടിക്ക് ശേഷം വെള്ളിയാഴ്ചയാണ് ത്രിരാജ്യ സന്ദര്‍ശനം ആരംഭിച്ചത്.
അതേസമയം റാലിയില്‍ പങ്കെടുക്കാനായി ഓസ്ട്രേലിയയിലെ വിവിധ മേഖലയില്‍ നിന്ന് നിരവധിപ്പേരാണ് സ്വകാര്യ ചാര്‍ട്ടേഡ് വിമാനങ്ങളിലായി സിഡ്നിയിലേക്ക് എത്തുന്നത്. കൂടാതെ മെല്‍ബണില്‍ നിന്ന് മോദി എയര്‍വെയ്സില്‍ സിഡ്നിയിലെത്തിയത് 170ൽ അധികം ആളുകളാണ്.
ത്രിവര്‍ണപതാക വീശിയും ദേശീയ പതാകയുടെ നിറമുള്ള തലപ്പാവുകളുമായാണ് ഓസ്ട്രേലിയയിലെ ഇന്ത്യൻ പ്രവാസികൾ പ്രധാനമന്ത്രി നരേന്ദ്ര മോദിയെ കാണാൻ എത്തിയത്. പ്രത്യേകം ചാർട്ട് ചെയ്ത മോദി എയര്‍വെയ്സില്‍ ആഘോഷമായായിരുന്നു യാത്ര.
