പീഡനക്കേസിൽ ജാമ്യം ലഭിച്ച് പുറത്തിറങ്ങിയതിന് പിന്നാലെ മുഖ്യമന്ത്രിക്കും മകൾക്കുമെതിരെ ഗുരുതര ആരോപണങ്ങളുമായി പി സി ജോർജ്. മുഖ്യമന്ത്രി പിണറായി വിജയനെ സ്വാധീനിക്കുന്നത് ഫാരിസ് അബൂബക്കറാണെന്നാണ് പിസി ജോർജിന്റെ ആരോപണം. മുഖ്യമന്ത്രിയുടെ അമേരിക്കൻ യാത്രകൾ അന്വേഷിക്കണം. മുഖ്യമന്ത്രിയുടെ പിന്നിൽ ഒളിച്ചിരിക്കുന്ന ഡോൺ ആണ് ഫാരിസ് അബൂബക്കർ. മുഖ്യമന്ത്രിയുടെ പണമിടപാടുകൾക്ക് വേണ്ടിയാണ് മകളുടെ കമ്പനി എന്ന് സംശയിക്കുന്നതായും അമേരിക്കയിലും യുഎഇയിലും ഉളള പണമിടപാടുകൾ അന്വേഷിക്കണമെന്നും പി സി ജോർജ് ആവശ്യപ്പെട്ടു.
സംസ്ഥാനത്ത് നിലവിലുള്ള രാഷ്ട്രീയ നാടകങ്ങൾക്ക് പിന്നിൽ മുഖ്യമന്ത്രിയും ഫാരീസ് അബൂബക്കറുമാണെന്നായിരുന്നു പി സി ജോർജിന്റെ ആരോപണം. പിണറായി വിജയനെതിരെ അന്വേഷണ ഏജന്‍സികള്‍ക്ക് പരാതി നല്‍കുമെന്ന് പി സി ജോർജ് പറഞ്ഞു. മുഖ്യമന്ത്രിയുടെ അമേരിക്കൻ യാത്രകളുടെ വിവരങ്ങൾ കേന്ദ്ര സർക്കാരും കേന്ദ്ര ഏജൻസികളും അന്വേഷിക്കണമെന്നും ജോർജ് ആവശ്യപ്പെട്ടു. പിണറായിയുടെ മകളുടെ സാമ്പത്തിക ഇടപാടുകൾ ഇ ഡി അന്വേഷിക്കണമെന്ന് പി സി ആവശ്യം ഉന്നയിച്ചു. വീണയുടെ കമ്പനിയുടെ സാമ്പത്തിക സ്രോതസിനെ കുറിച്ചും എക്സാലോജിക്കിന്‍റെ ഇടപാടുകൾക്കെതിരെയും ആരോപണമുന്നയിച്ചു. സോളർ തട്ടിപ്പ് കേസിലെ പ്രതി നൽകിയ പരാതിയിൽ അറസ്റ്റിലായ പി സി ജോർജിന് തിരുവനന്തപുരം ജുഡീഷ്യൽ മജിസ്ട്രേറ്റ് കോടതിയാണ് ജാമ്യം അനുവദിച്ചത്.
